काठमाडौं,कार्तिक २२ : नेपालीहरूको महान् पर्व तिहार अन्तर्गत आज आइतबार कुकुर तिहार र लक्ष्मीपूजा एकैसाथ परेको छ। तिथीको घटबढका कारण आज बिहान कुकुर तिहार र साँझ लक्ष्मीपूजा मनाउन लागिएको नेपाल पञ्चाङ्ग निर्णायक समितिले जनाएको छ।
आज बिहान यमराजको दूत मानिने कुकुरलाई पूजा आराधना गर्दै माला लगाइदिने, टीका लगाउने र मीठा-मीठा परिकार खान दिने परम्परा छ। धार्मिक विश्वास अनुसार यसरी कुकुरलाई पूजा गर्दा यमलोक जाँदा बाटो खुल्ने जनविश्वास छ। घरको सुरक्षा र आज्ञापालक स्वभावका कारण पनि कुकुरलाई मानिसको सबैभन्दा बफादार साथी मानिन्छ।
त्यस्तै, आजै साँझ धन, ऐश्वर्य र समृद्धिकी देवी लक्ष्मीको पूजा आराधना गरिन्छ। लक्ष्मीपूजाका लागि मानिसहरूले आफ्नो घर-आँगन सफा गरी दीप प्रज्वलन, फूलमाला र रंगोलीले सिंगार्ने गर्दछन् । घरलाई झिलिमिली उज्यालो पार्नाले माता लक्ष्मीको आगमन भई सुख, शान्ति र समृद्धि प्राप्त हुने धार्मिक मान्यता रही आएको छ ।
