काठमाडौं । नेपाल कम्युनिस्ट पार्टी (एमाले) भित्र अध्यक्ष केपी शर्मा ओलीको नेतृत्व परिवर्तन र पार्टी रूपान्तरणको माग गर्दै आन्तरिक विद्रोह तीव्र बनेको छ । निर्वाचनमा ब्यहोरेको अनपेक्षित परिणामपछि रक्षात्मक बनेको पार्टीभित्र युवा नेताले सुरु गरेको ‘पुनर्जागरण अभियान–२०८२’ ले बिहीबार सार्वजनिक गरेको मत सर्वेक्षण प्रतिवेदनले एमाले वृत्तमा नयाँ तरंग पैदा गरेको छ ।
एमालेभित्र नेतृत्व परिवर्तनको दबाब तीव्र
पार्टी रूपान्तरण र पुनर्संरचनाका लागि देश तथा विदेशका १४ देशमा रहेका एमालेका संगठित सदस्य, समर्थक र स्वतन्त्र नागरिकमाझ गरिएको विशेष डिजिटल सर्वेक्षणमा सहभागी ८७ दशमलव ६ प्रतिशतले तत्काल नेतृत्व परिवर्तन हुनुपर्ने पक्षमा स्पष्ट मत जाहेर गरेका छन् । अभियानका सदस्यहरूले यो विस्फोटक नतिजासहितको प्रतिवेदन बिहीबार नै पार्टीका महासचिव एवं समीक्षा तथा पुनर्गठन कार्यदलका सदस्य सचिव शंकर पोखरेलसमक्ष बुझाएका छन् ।
कार्यशैली र आचरणप्रति तीव्र असन्तुष्टि
सार्वजनिक प्रतिवेदनअनुसार एमाले पंक्तिभित्र वर्तमान नेतृत्वको कार्यशैली र व्यवहारप्रति व्यापक असन्तुष्टि चुलिएको छ । सर्वेक्षणमा सहभागी ९५ दशमलव ४ प्रतिशतले नेतृत्वको आचरण र व्यवहार सुध्रिनुपर्ने माग गरेका छन् भने ९१ दशमलव ४ प्रतिशतले हालकै अवस्था र कार्यशैलीमा पार्टी अगाडि बढ्न नसक्ने भन्दै आमूल रूपान्तरणको विकल्प नरहेको औँल्याएका छन् ।
नेतृत्व हस्तान्तरण कुन तहमा गर्ने भन्ने सन्दर्भमा ५० दशमलव २ प्रतिशत सहभागीले केन्द्रीय कमिटीभित्रैबाट नयाँ नेतृत्व चयन गरिनुपर्ने सुझाव दिएका छन् । त्यस्तै, एउटै पदमा बढीमा दुई पटक मात्र जिम्मेवारी दिन पाइने गरी कार्यकालको सीमा तोक्नुपर्ने प्रस्तावलाई ८२ दशमलव ८ प्रतिशतले दृढतापूर्वक समर्थन गरेका छन् ।
नेताहरूको मोर्चाबन्दी र कार्यदलको गृहकार्य
पार्टीभित्र निर्वाचनमा पराजयको समीक्षा एवं सांगठनिक पुनर्गठनका लागि भन्दै औपचारिकरूपमा गठन गरिएको पुनर्गठन सुझाव कार्यदलले देशैभरिबाट सुझाव संकलन गरिरहेको छ । एमाले स्रोतका अनुसार पार्टीको अस्तित्व संकटमा पर्न थालेको निष्कर्ष निकाल्दै सचिवालयका शीर्ष नेताहरूसमेत अध्यक्ष ओलीको सहज बहिर्गमनको पक्षमा उभिन थालेका छन् ।
यसअघि नै काठमाडौं जिल्ला कमिटीले ओलीको नेतृत्वमा अब कम्युनिस्ट आन्दोलन र एमाले अगाडि बढ्न नसक्ने आधिकारिक निष्कर्ष निकालिसकेको छ । युवा नेताहरू नरेश रोकाया, समिक बडाल र झपट रावललगायतले नेतृत्व गरेको यस अभियानलाई पार्टीभित्रका वरिष्ठ नेताहरू तथा पूर्वराष्ट्रपति विद्यादेवी भण्डारीको समेत रणनीतिक समर्थन रहेको चर्चाले पार्टीभित्रको आन्तरिक शक्ति सन्तुलन हल्लिएको संकेत गरेको छ ।
ओलीको आक्रोश र चुनौती
आफूमाथि चौतर्फी दबाब बढेपछि अध्यक्ष ओली भने थप आक्रामक बनेका छन् । हालै च्यासलस्थित पार्टी कार्यालयमा आयोजित एक कार्यक्रममा बोल्दै ओलीले अप्ठ्यारो परिस्थितिमा आफूले नेतृत्व नछोड्ने र पार्टीलाई सफल बनाएर मात्र विधिसम्मत विश्राम लिने दोहो¥याएका छन् ।
उनले नेतृत्व परिवर्तनको कुरा उठाएर पार्टीलाई कमजोर बनाउन खोज्नेलाई कारबाही गरिने चेतावनीसमेत दिएका छन् । ओली पक्षीय नेताहरूले महाधिवेशनको वैधानिक प्रक्रियाबाहेक अन्य दबाबका आधारमा नेतृत्व परिवर्तन सम्भव नरहेको निष्कर्ष निकालेका छन् ।
तर आन्तरिक मत सर्वेक्षणको यो तथ्यांक सार्वजनिक भएसँगै एमालेभित्र पहिलो पुस्ताको सम्मानजनक बिदाइ र दोस्रो तथा तेस्रो पुस्तामा नेतृत्व हस्तान्तरणका लागि विशेष वा अग्रिम महाधिवेशन डाक्नुपर्ने बहस अब जोडतोडले अगाडि बढ्ने देखिन्छ ।
