काठमाडौँ : ललितपुर जिल्ला अदालतले टिकटकर तुलसा अधिकारीलाई पुर्पक्षका लागि जेल चलानकोआदेश गरेको छ । अदालतका न्यायाधीश टेकनाथ गौतमको इजलासले उनलाई पुर्पक्षका लागि थुनामा पठाउने आदेश गरेको हो ।उनलाई इन्टरपोलको सहयोगमा यही जेठ १७ गते थाइल्यान्डबाट पक्राउ गरी नेपाल ल्याएको थियो । उनीविरुद्ध आपराधिक विश्वासघात, संगठित अपराध, सम्पत्ति शुद्धीकरणसमेतको मुद्दा दायर भएको छ । पक्राउ पर्नु अघि उनले सामाजिक सञ्जालबाटै प्रतिवाद सहित विभिन्न प्रतिक्रिया दिँदै आएकी थिइन् ।
अधिकारीविरुद्ध कुमार चिमोरियाको जाहेरीका आधारमा नेपाल प्रहरीले अनुसन्धान अघि बढाएको थियो । उनीविरुद्ध आपराधिक लाभ (एक्सटर्सन), संगठित अपराध र सम्पत्ति शुद्धीकरण (मनि लाउण्डरिङ) जस्ता गम्भीर कसूरमा मुद्दा दायर भएको छ । यस प्रकरणमा अधिकारीसहित १० जनालाई प्रतिवादी बनाइएको अदालतले जनाएको छ ।
