काठमाडौं, ३१ वैशाख — काठमाडौंको बागबजारमा एक विवाहित युवतीको हत्या भएको घटनामा प्रहरीले पूर्वसैनिक रामचन्द्र पन्तलाई पक्राउ गरेको छ। पन्त धादिङका स्थायी बासिन्दा हुन्। जिल्ला प्रहरी परिसर काठमाडौंका प्रवक्ता एसपी अपील राज बोहराका अनुसार, घटनाको मिति गत चैत ११ गते भए पनि पन्तलाई मंगलबार मात्र पक्राउ गरिएको हो।
प्रहरी अनुसन्धानमा खुल्न आएको विवरणअनुसार, पन्त र मृतक युवतीबीच फेसबुकमार्फत चिनजान भएको थियो। उनीहरू करिब ५–६ महिनादेखि प्रेम सम्बन्धमा थिए। दुवैजनाको पहिलो वैवाहिक सम्बन्ध टुटेको र पछिल्लो समय एकल जीवन बिताइरहेका थिए। परिवारका सदस्यहरूले समयमै खोजी नगरेका कारण शव सड्ने अवस्थामा पुगेको प्रहरी उपरीक्षक नवराज अधिकारीले जानकारी दिए। घटनाको थप अनुसन्धान जारी रहेको छ।
