दाङको तुलसीपुरस्थित माध्यमिक विद्यालय तुलसीपुर सेन्टर ले २०८० को एसईई र कक्षा १२ को नतिजाका आधारमा देशकै उत्कृष्ट विद्यालय घोषित हुँदै राष्ट्रिय शिक्षा दिवस २०८१ मा प्रधानमन्त्रीबाट ३ लाख नगद, शिल्ड र प्रमाणपत्र प्राप्त गरेको छ। विद्यालयको यो सफलता शैक्षिक गुणस्तर, प्रविधिको प्रयोग, अभिभावक सहभागिता, भौतिक पूर्वाधार र जिम्मेवार नेतृत्व को संयोजनले सम्भव भएको हो।
पूर्व अञ्चलाधीशको पहलमा स्थापना भएको विद्यालय अहिले ५९ कक्षासहित २७०० विद्यार्थी, १०१ स्टाफ र २ करोड रुपैयाँ बैंक मौज्दात भएको संस्थामा रूपान्तरण भएको छ। स्मार्ट बोर्ड, एसी कक्षाकोठा, सीसीटीभी निगरानी, मोबाइल एप, र काउन्सिलिङ सेवा सहितका सुविधा उपलब्ध छन्। शिक्षक-कर्मचारीले आफ्नै छोराछोरी यहीँ पढाउनुपर्ने नीति र स्वेच्छिक शुल्क प्रणाली लागू गरिएको छ। डेल दाजुभाइको नेतृत्वमा विद्यालयले उल्लेखनीय उन्नति हासिल गर्दै सरकारी विद्यालयका लागि प्रेरणाको स्रोत बनेको छ।
