काठमाडौँ, असार ११, २०८२ । शिक्षामा अनुशासन र नैतिकताको गम्भीर प्रश्न उठाउने घटनामा एक युवक आफ्नै काकाको परीक्षार्थी बनेर एमपीए (M.P.A.) तेस्रो सेमेस्टरको परीक्षा दिन गएका बेला पक्राउ परेका छन्। पक्राउ पर्ने युवक २६ वर्षीय केशव रोकाया हुन्, जो जुम्ला चन्दननाथ नगरपालिका–८ स्थायी बासिन्दा र हाल काठमाडौँ धुम्बाराही बसोबास गर्दै आएका हुन्। जनप्रशासन क्याम्पस, काठमाडौँ–१४ मा मंगलबार भएको परीक्षामा केशव रोकाया आफ्नो काका दानबहादुर रोकायाको सट्टामा परीक्षामा सहभागी भएका थिए। तर क्याम्पस प्रशासनले अनुचित गतिविधिको आशंका गरी प्रहरीलाई खबर गरेपछि, कालीमाटी प्रहरी वृत्तबाट खटिएको टोलीले उनलाई पक्राउ गर्यो।
प्रहरीले केशव रोकायामाथि शिक्षासम्बन्धी कसुर अन्तर्गत मुद्दा दर्ता गरी अनुसन्धान थालेको छ। जिल्ला प्रहरी परिसर काठमाडौँका सूचना अधिकारी एसपी अपिलराज बोहराका अनुसार, मुद्दाको अनुसन्धानका लागि ५ दिनको म्याद थप गरिएको छ। यो घटना नेपाली शिक्षामा मौलाउँदै गएको नैतिक संकट र गैरजिम्मेवारपनको ज्वलन्त उदाहरण हो। परीक्षामा नक्कली परीक्षार्थी पठाउने कार्य न केवल शैक्षिक प्रणालीमाथिको विश्वास हरण हो, यो कानूनी अपराध पनि हो। विशेष गरी त्रिभुवन विश्वविद्यालय अन्तर्गतका सार्वजनिक शैक्षिक संस्थाहरूमा यस्ता गतिविधि दोहोरिनु निकै गम्भीर संकेत हो।
शिक्षाको गुणस्तर जोगाउने जिम्मेवारी विद्यार्थी, शिक्षक, अभिभावक र संस्थाहरू सबैको हो। परीक्षा केन्द्रमा निगरानी प्रणालीको सुदृढीकरण, परीक्षार्थीको कडाइका साथ पहिचान जाँच तथा शिक्षामा नैतिक शिक्षाको जोड यो समस्याको दीर्घकालीन समाधान हुन सक्छ।
