वीरेन्द्रनगर सुर्खेत कार्तिक १४ : डोल्पाको सदरमुकाम दुनैस्थित जिल्ला कारागारबाट सुरुङ खनेर आठ जना कैदी फरार भएका छन
शुक्रबार राति कारागारभित्र सुरुङ खनेर उनीहरू फरार भएका हुन्। फरार हुनेमध्ये पाँच जना जबर्जस्ती करणी मुद्दामा कैद सजाय भोगिरहेका थिए भने तीन जना चोरी मुद्दामा पुर्पक्षका लागि थुनामा रहेका थिए ।
जिल्ला प्रहरी कार्यालय, डोल्पाका अनुसार फरार हुनेहरूमा रुकुम पश्चिमको आठबिसकोट नगरपालिका–१० का ३२ वर्षीय राम विक, डोल्पाको त्रिपुरासुन्दरी नगरपालिका–७ का २९ वर्षीय कालिप्रसाद रोकाया, सल्यानको कुमाख गाउँपालिका–५ का २८ वर्षीय रेशम राना, जाजरकोटको बारेकोट गाउँपालिका–१ का २५ वर्षीय यज्ञ विक र डोल्पाको त्रिपुरासुन्दरी नगरपालिका–४ का २८ वर्षीय धन बुढा भनिने हरिबहादुर बुढा रहेका छन्। उनीहरू जबर्जस्ती करणी मुद्दामा कैद सजाय भोगिरहेका थिए।
जिल्ला प्रहरी कार्यालय, डोल्पाका प्रहरी नायब उपरीक्षक (डिएसपी) अनिलराज गिरीका अनुसार कैदीहरूले कारागारबाट बाहिर निस्कन ४.६३ मिटर लामो सुरुङ खनेका थिए। सोही सुरुङ प्रयोग गरेर आठै जना फरार भएका हुन्। घटनापछि प्रहरीले फरार कैदीहरूको खोजी कार्य सुरु गरेको जनाएको छ। उनीहरू सम्भावित रूपमा जान सक्ने क्षेत्र तथा नाकाहरूमा निगरानी बढाउँदै खोजी कार्यलाई तीव्र पारिएको छ।
