जाजरकोट, २३ असार – डिभिजन वन कार्यालय जाजरकोटका प्रमुख अमर प्रसाद साहमाथि कार्यालयमै कुटपिट भएको छ। आइतबार दिउँसो करिब ४ बजेको समयमा एक अज्ञात समूहले कार्यकक्षमा प्रवेश गरी डिभिजनल वन अधिकृत (DFO) साहमाथि हातपात गरेको हो। जिल्ला प्रहरी कार्यालय, जाजरकोटका सूचना अधिकारी हरिराम डाँगीका अनुसार, कालो मास्क लगाएका ३–४ जनाको समूह कार्यालयमा पसेर अचानक साहमाथि आक्रमण गरेको थियो। आक्रमणपछि उनीहरू फरार भएका छन्।
“डिभिजनल वन अधिकृतमाथि हातपात भएको जानकारी पाउनेबित्तिकै प्रहरी टोली घटनास्थलमा पुगेको छ। आक्रमणकारीहरूको खोजी तीव्र पारिएको छ,” डाँगीले जानकारी दिए। उनका अनुसार सम्भावित स्थानहरूमा प्रहरी परिचालन गरी निगरानी बढाइएको छ। घटनाको यकिन कारण भने हालसम्म खुल्न सकेको छैन। यद्यपि, आक्रमणकारीहरूले साहलाई ‘भ्रष्टाचारी’ भन्दै दुर्व्यवहार गरेको प्रारम्भिक विवरण आएको प्रहरीले जनाएको छ। केही समयअघि साहले कार्यकक्षभित्र मदिरासहितको पार्टी गरेको विषय बाहिरिएको थियो, जसले विवाद सिर्जना गरेको थियो। प्रहरीले आक्रमणमा संलग्न व्यक्तिहरूको पहिचान खुलाउने प्रयास जारी रहेको जनाएको छ। डिएफओ साहको स्वास्थ्य अवस्था भने सामान्य रहेको बताइएको छ।
