२८ असार, काठमाडौं । देशभर मनसुनी वायुको प्रभाव सक्रिय रहेकाले बागमती, गण्डकी, लुम्बिनी, कर्णाली र सुदूरपश्चिम प्रदेशका केही स्थानहरूमा आज भारी वर्षाको सम्भावना रहेको मौसम पूर्वानुमान महाशाखाले जनाएको छ। महाशाखाका अनुसार हाल मनसुनको न्यून चापीय रेखा पूर्वी नेपालमा सरदर स्थानको आसपास र पश्चिमतर्फ सरदर स्थानभन्दा केही उत्तरतिर रहेको छ। त्यसकै प्रभावस्वरूप देशभर आंशिकदेखि सामान्य बदली रहेको छ।
बागमती, गण्डकी र सुदूरपश्चिम प्रदेशलगायतका पहाडी भू–भागमा मेघगर्जन तथा चट्याङसहित हल्कादेखि मध्यम वर्षाको सम्भावना रहेको बताइएको छ। अन्य भू–भागका थोरै स्थानहरूमा पनि यस्तै प्रकारको मौसम देखिने अनुमान गरिएको छ। देशको उच्च–पहाडी तथा हिमाली भू–भागका थोरै स्थानहरूमा हल्कादेखि मध्यम वर्षा तथा हिमपात हुन सक्ने सम्भावना महाशाखाले जनाएको छ।
आज रातिसमेत देशभर आंशिकदेखि सामान्य बदली रहनेछ। कोशी, मधेश, बागमती र गण्डकी प्रदेशका केही स्थानमा मेघगर्जनसहित हल्कादेखि मध्यम वर्षा र एक–दुई स्थानमा भारी वर्षा हुन सक्ने पूर्वानुमान गरिएको छ। मौसम पूर्वानुमान महाशाखाले सम्भावित भारी वर्षाका कारण पहिरो, बाढी तथा जलमग्नताको जोखिमलाई मध्यनजर गर्दै आवश्यक सतर्कता अपनाउन सर्वसाधारणलाई अनुरोध गरेको छ।
