४ साउन, काठमाडौं । अन्तर्राष्ट्रिय स्तरमा पदक जितेर नेपालको गौरव बढाएकी उमा कुङफु खेलाडी सरिना घलेलाई धादिङ–नुवाकोट समाज युकेले सम्मान गरेको छ। नेपाल उमा कुङफु संघका अध्यक्ष संजीतकुमार राईका अनुसार सरिनालाई अन्तर्राष्ट्रिय प्रतियोगितामा स्वर्ण पदक जितेको योगदानस्वरूप सम्मान गरिएको हो। ब्रिटेनमा आयोजित डब्लुएमएसी ब्रिटिस ओपन च्याम्पियनसिप र डब्लुएमएसी इङलिस च्याम्पियनसिपमा सरिनाले स्वर्ण पदक जितेकी हुन्।
सम्मान कार्यक्रम एनुएल समर गेट टुगेदर को अवसरमा आयोजना गरिएको थियो। कार्यक्रममा बागमती प्रदेशका मुख्यमन्त्री बहादुरसिंह लामा र समाजका अध्यक्ष धनबहादुर तामाङले सरिनालाई प्रशंसा पत्रसहित सम्मान गरेका थिए। अघिल्ला सफलताका आधारमा सरिनालाई तमु धि समाज युके र मगर एसोसिएसन युकेले पनि सम्मान गरिसकेका छन्। तेस्रो डान (Third Dan) प्राप्त गरिसकेकी सरिना हाल युकेमै मास्टर्स अध्ययन गरिरहेकी छन्। उनी आउँदो सेप्टेम्बर १८ देखि २१ तारिखसम्म हुने डब्लुएमएसी इलाइट वर्ल्ड च्याम्पियनसिपमा सहभागिता जनाउने तयारीमा छन्। नेपाल उमा कुङफु संघले सरिनाको यो यात्रा र उपलब्धिलाई देशको लागि गौरवको विषय भन्दै शुभकामना दिएको छ।
