जनकपुरधाम, साउन ९ — सर्लाही जिल्लाको ईश्वरपुर नगरपालिका–२, राइटरखोपस्थित एक पशुपालन फर्मबाट भन्सार छली गरी लुकाइ राखिएको १ करोड ५८ लाख ५९ हजार रुपैयाँ बराबरको सामान सशस्त्र प्रहरीले बरामद गरेको छ। सशस्त्र प्रहरी बल र भन्सार कार्यालय मलंगवाको संयुक्त टोलीले तुलसी पशुपालन फर्ममा विशेष सुराकीका आधारमा छापा मारेको थियो। छापामारीका क्रममा ३१ पोका कपडा बरामद गरिएको सशस्त्र प्रहरीले जनाएको छ। प्रहरीका अनुसार पशुपालन फर्मको आवरणमा ठूलो मात्रामा अवैध सामान भित्र्याइने गरिएको थियो। बरामद सामग्री सबै विदेशी मुलुकबाट ल्याइएको कपडा भएको अनुमान गरिएको छ। सशस्त्र प्रहरी बल मधेश प्रदेशका प्रमुख नायब महानिरीक्षक कृष्ण ढकालले बरामद सामग्री भन्सार कार्यालय मलंगवामा दाखिला गरिएको जानकारी दिए। उनका अनुसार अब घटनासम्बन्धी थप अनुसन्धान भन्सार विभाग र प्रहरीको समन्वयमा अगाडि बढाइनेछ।
