पोखरा ।
मंगलबार प्रदेश सभा बैठकलाई सम्बोधन गर्दै प्रदेशका मुख्यमन्त्री सुरेन्द्रराज पाण्डेले विगत देखि नै प्रदेश र स्थानीय तहका अधिकारका लागि लडाइँ रहेकोले अहिले पनि त्यो कायम रहेको बताए ।‘विगतका संघीय सरकारहरूसँग पनि हाम्रा प्रदेश सरकारहरूले जे जति हामीले अधिकार प्राप्तिका लागि आवाज उठायौं । चाहे त्यो राजनीतिक अधिकार भन्नुस्, चाहे प्रशासनिक अधिकार भन्नुस्, चाहे वित्तीय अधिकार भन्नुस्, विगत ३ वर्ष ४ वर्षदेखि हामीले आफ्नो आवाज उठाउँदै आएका छौँ,’ उनले भने, ‘गण्डकी प्रदेशले त्यसको नेतृत्व नै गरेको छ । यहाँहरूलाई पनि अवगत भएकै कुरा हो । त्यो लडाइँ कायम छ ।’ उनले प्रदेशलाई दिनुपर्ने अधिकार प्राप्तिका लागि मुख्यमन्त्रीहरूको भेला राखेरै संघ सरकारको ध्यानाकर्षण गराउने बताए । ‘अब छिट्टै हामीले ७ वटै प्रदेशका मुख्यमन्त्रीहरूको बैठक राखेर फेरि हाम्रा कन्सर्नहरू, हाम्रा चासोहरू र संविधानमा लेखिएका तर हामीले प्राप्त गर्न नसकिएका कानुनी अधिकारहरूका बारेमा संघ सरकारलाई सुनाउछौं,’ अघि भने, ‘चाहे त्यो प्रहरी सम्बन्धी ऐन भन्नुस्, चाहे यो कर्मचारी ऐन भन्नुस्, चाहे शिक्षा ऐन लगायतका अथवा जग्गा प्राप्तिका कुरा, ऐन जे छ । त्यसलाई फेरि नयाँ आएको सरकार समक्ष पनि हामीले राख्नेछौँ ।’
