पोखरा । गण्डकीमा नेपाली कांग्रेस र नेकपा एमालेले पुराना सबै मन्त्री फिर्ता बोलाएर नयाँ मन्त्री पठाएका छन् । कांग्रेसबाट बुधवार ४ र एमालेबाट ४ जना नयाँ मन्त्री नियुक्त भएका हुन् । मुख्यमन्त्री सुरेन्द्रराज पाण्डेले झन्डै २ वर्षपछि मन्त्रिपरिषद् हेरफेर गरेका हुन् । २०८० भदौमा एमालेका मन्त्री नियुक्त भएपछि स्थिर रूपमा चलेको गण्डकी सरकारका मन्त्रीहरू आज चर्चाबिना परिवर्तन गरिएको हो । मुख्यमन्त्री पाण्डेले मन्त्रिपरिषद् हेरफेरबारे निकटस्थहरूलाई समेत सुइँको नदिएर आन्तरिक रूपमा गृहकार्य गरिरहेका थिए । चैत २६ गते नै नयाँ मन्त्री नियुक्त गर्ने तयारी गरिए पनि प्रदेश प्रमुख डिल्लीराज भट्ट मनाङ घुम्न गएका कारण समयमा रोकिएको थियो ।
मन्त्री हेरफेर गर्ने कुरामा कांग्रेस केन्द्रमा सहमति नभएको पाइएको छ । सहमहामन्त्री योगेन्द्र चौधरीले सबै प्रदेशमा मन्त्री फेरबदलको विषयमा कुराकानी चले पनि गण्डकीमा आजै परिवर्तनबारे पदाधिकारी तहमा कुनै जानकारी नभएको बताए । ‘सबै प्रदेशमा मन्त्रीहरू फेरबदल गर्ने कुरा चलेको थियो । गण्डकीमा आजै परिवर्तन गर्ने भन्ने विषय पदाधिकारी तहमा ब्रिफिङ भएको थिएन,’ सहमहामन्त्री चौधरीले लालबिहानीसँग भने, ‘समन्वय गर्न उपसभापति विश्वप्रकाश शर्मालाई जिम्मेवारी दिएका थियौँ । अहिलेसम्म उहाँले हामीलाई ब्रिफिङ गर्नुभएको छैन ।’
