काठमाडौं :
सरकारले डिजेल र मट्टीतेलको मूल्य ३० रुपैयाँ बढाएको छ। नेपाल आयल निगमले बुधबार जारी गरेको सूचनामा डिजेल र मट्टितेलको मूल्य बढेको जानकारी दिएको हो। योसँगै काठमाडौं, पोखरा, दिपायलमा डिजेलको मूल्य बुधबार मध्यरातिबाट प्रतिलिटर २३७ रुपैयाँ पुगेको छ।
मूल्य समायोजनपश्चात समेत डिजेलमा प्रति लिटर ९९.१६ रुपैंयाले अझै घाटा हुने निगमको भनाई छ। निगमले आन्तरिकतर्फको हवाई इन्धनको मूल्य पनि प्रतिलिटर ५ रुपैयाँले वृद्धि गरेको छ।
पेट्रोलको मूल्य यथावत् राखिएको निगमको भनाई छ। मध्यपूर्वमा जारी रहेको युद्धका कारण अन्तर्राष्ट्रिय बजारमा पेट्रोलियम पदार्थको निरन्तर मूल्यवृद्धि भइरहेको विज्ञप्तिमा उल्लेख छ।
मूल्यवृद्धि निरन्तर भएपछि सरकारले केही दिन अगाडि सार्वजनिक सवारी साधनको भाडा वृद्धि गरेको थियो। व्यवसायीहरूका अनुसार ढुवानी खर्च ह्वात्तै बढ्ने भएकाले तरकारी, खाद्यान्न, निर्माण सामग्री लगायतका वस्तुको मूल्य फेरि बढ्न सक्नेछ। डिजेल ढुवानी तथा औद्योगिक क्षेत्रमा प्रमुख रूपमा प्रयोग हुने भएकाले मूल्यवृद्धिको सीधा असर दैनिक उपभोग्य वस्तुमा पर्ने निश्चित छ।
