माली : मालीका रक्षामन्त्री जनरल सादियो कामारा देशभरका सैनिकस्थलहरूमा भएका आक्रमणका क्रममा मारिएका छन् । शनिबार अल–कायदा सम्बन्धित समूह र तुआरेग विद्रोहीहरूले एकैसाथ आक्रमण गर्दा कातीस्थित उनको निवासमा आक्रमण गरिएको थियो ।
कामारा २०२० र २०२१ मा भएका लगातार कू (सत्ता कब्जा) पछि सत्ता सम्हालेको सैनिक सरकारका मुख्य व्यक्तित्वमध्ये एक थिए । उनी सत्तारूढ सैनिक नेतृत्वभित्र सबैभन्दा प्रभावशाली व्यक्तिहरूमध्ये एक थिए । कतिपयले उनलाई मालीको सम्भावित भविष्यका नेता पनि मानेका थिए । उनको मृत्यु देशको सेना लागि ठूलो क्षति हो । आक्रमणकारीहरूले कातीस्थित कामाराको निवासमा आत्मघाती कार बम आक्रमण गरेका थिए । काती राजधानी बामाकोबाट करिब १५ किलोमिटर उत्तर–पश्चिममा रहेको कडा सुरक्षायुक्त सैनिक सहर हो ।
कातीलाई देशकै सबैभन्दा सुरक्षित स्थानमध्ये एक मानिन्छ, तर पनि अल–कायदा सम्बन्धित जमाअत नुसरत अल–इस्लाम वाल–मुस्लिमीनका लडाकुहरू र अजावाद मुक्ति मोर्चाका तुआरेग लडाकुहरूले आक्रमण गर्न सफल भएको जनाइएको छ । सशस्त्र समूहहरूले मालीका अन्य धेरै स्थानहरूमा पनि आक्रमण गरेका छन्, जसमा राजधानी बामाको, उत्तरी सहरहरू गाओ र किदाल, तथा मध्य भागको सेभारे सहर समावेश छन् ।
