गण्डकीलाई नमुना बनाउन पोखराबाट कांग्रेसको ३० बुँदे सङ्कल्प

सङ्घीयताको मर्म अनुरूप गाउँ र नगरको समुन्नतिलाई नै नेपालको समुन्नतिको प्रमुख आधार मान्दै कांग्रेसले गण्डकी प्रदेशलाई राष्ट्रिय समुन्नतिकै उदाहरणीय प्रदेश बनाउने घोषणा गरेको छ । सुशासन, आर्थिक विकास, स्वास्थ्य, पूर्वाधार, पर्यटनदेखि विदेशमा रहेका नागरिकको सीपलाई गाउँसँग जोड्नेसम्मका नवीन योजनाहरू सङ्कल्पका रूपमा अघि सारिएका छन् । कांग्रेसले आफ्ना जनप्रतिनिधिले नेतृत्व गरेका स्थानीय तथा प्रदेश सरकारलाई विधिको शासन र जवाफदेहितामा प्रतिबद्ध गराउने जनाएको छ । अनावश्यक संरचना खारेज वा समायोजन गरी कार्यालयहरूको खर्च घटाउने र चुस्त सेवा प्रवाह गर्ने सङ्कल्पमा उल्लेख छ। देशमै पहिलो पटक गण्डकी प्रदेश सरकारले प्रशासनिक पुनर्संरचना मार्फत कार्यालयहरू मर्ज र खारेज गरेको छ । ३२ कार्यालयलाई मर्ज गरेर १९ वटा बनाइएको छ भने केही संरचना पूर्णतः खारेज गरिएका छन् । यसको नेतृत्व मुख्यमन्त्री सुरेन्द्रराज पाण्डेले गरेका हुन् । अहिले देशैभरी यही लहर चलिरहेको छ । कांग्रेसले स्थानीय तहमा पनि यो मोडल लागू गर्ने जनाएको छ ।