काठमाडौँ । सरकारले काठमाडौँ उपत्यकाका विभिन्न स्थानका सुकुमबासी बस्तीमा डोजर चलाएपछि अहिले हजारौँ मानिसहरू घरविहीन भएका छन् ।
बस्ती भत्काइएपछि कतिपय मानिस आफैँ व्यवस्थापन गरी अन्यत्र बस्न गएका छन् भने कतिपयलाई सरकारले विभिन्न होल्डिङ सेन्टरमा राखेको छ ।
यसै क्रममा उपत्यकाका विभिन्न बस्तीबाट विस्थापित भएका ११० जनालाई गत वैशाख २४ गते बनेपास्थित नेपाल रेडक्रसको प्रशिक्षण केन्द्रमा पुर्याइएको छ । होल्डिङ सेन्टरमा बस्दै आएका यी थातथलोविहीन नागरिकको सरकारसँग गुनासै गुनासो र विभिन्न मागहरू रहेका छन् ।
त्यस्तै बालाजु बस्तीबाट विस्थापित भई बनेपा पुगेका ६६ वर्षीय तोयनाथ मिश्रको पिसाब सम्बन्धी गम्भीर समस्या छ । पिसाबको थैली हातमै बोकेर हिँड्न बाध्य भएका मिश्रले ढिलै भए पनि सरकारले आफ्नो उचित व्यवस्था गर्ने आस राखेका छन् । सेन्टरमा रहेका साना केटाकेटीहरूले पनि समयमै विद्यालय जान पाउने वातावरण मिलाउन माग गरेका छन् । नेपाल रेडक्रस जनशक्ति विकास प्रतिष्ठानकी विभागीय प्रमुख श्राद्ध श्रेष्ठका अनुसार सहरी विकास मन्त्रालयको पत्राचारपछि वैशाख २४ गते बेलुका तीनवटा गाडीमा ११० जना विस्थापितलाई त्यहाँ ल्याइएको हो । मन्त्रालयले कुल १५४ जनाको आवास तथा खाना व्यवस्थापनका लागि पत्राचार गरेको उनले जानकारी दिइन् । बनेपा पुर्याइएकाहरूमा विभिन्न उमेर समूह र फरक अवस्थाका मानिसहरू छन्, जसमा एक जना नौ दिनकी सुत्केरी समेत छिन् । विस्थापितहरूमा १८ वर्ष मुनिका २६ जना बालबालिका छन्, जसमा १६ जना बालिका र १० जना बालक छन् । त्यस्तै ज्येष्ठ नागरिकको सङ्ख्या लगभग १६ जना रहेको छ ।
विभागीय प्रमुख श्रेष्ठले प्रतिष्ठानको वास्तविक क्षमता ६० जनाको बेड क्यापासिटी मात्र रहेको स्पष्ट पारेकी छन् । यो मुख्यतः तालिम केन्द्र भएकाले बेड र लजिङको व्यवस्था सिमित भएको अवस्थामा अचानक ११० जना आउँदा व्यवस्थापनमा निकै चुनौती थपिएको उनले बताइन् ।
