काठमाण्डौ राष्ट्र, राष्ट्रियता, धर्म संस्कृति तथा नागरिक बचाउ महाअभियानका संयोजक दुर्गा प्रसाईंमाथि दुई वटा कसुरमा म्याद थप भएको छ।
मंगलबार प्रहरीले जिल्ला अदालत पर्साबाट विद्युतीय कारोबार ऐन (साइबर अपराध) र राज्यविरूद्ध कसुरमा म्याद थप गरेको डिएसपी हरिबहादुर बस्नेतले जानकारी दिए।
प्रसाईंलाई ३ दिन हिरासतमा राख्न प्रहरीले अनुमति पाएको छ।
उनले सामाजिक सञ्जालमार्फत विभिन्न किसिमका अभिव्यक्ति दिएको आरोप लगाएका छन्।
‘सार्वजनिक नैतिकता, शिष्टाचारविरूद्ध कसैप्रति घृणा वा द्वेष फैलाउने र विभिन्न जातजाति र सम्प्रदायबीचको सुमधुर सम्बन्धलाई खलल पार्ने र नेपाल सरकार वा सरकारका काम कारबाहीको सम्बन्धमा कुनै किसिमबाट निराधार वा अप्रमाणित कुरा देखाएर सरकारप्रति घृणा, द्वेष वा अवहेलना गरी अमर्यादित तथा अस्वस्थ आलोचनात्मक अभिव्यक्तिहरू दिएका थिए,’ प्रहरीले जारी गरेको वक्तव्यमा भनिएको छ।
उनलाई प्रहरीले गएराति वीरगञ्जस्थित सिद्धार्थ दियाल होटलबाट पक्राउ गरेको थियो।
