सुनसरी : सशस्त्र प्रहरीमा रिक्त रहेको सशस्त्र प्रहरी अतिरिक्त महानिरीक्षक ( एआईजी) पदमा चितवनस्थित बाहिनीपति डीआईजी अन्जनी कुमार पोखरेललाई बढुवाका लागि सिफारिस गरिएको छ । गृह मन्त्रालयको बढुवा समितिका सदस्य सचिव नारायण दत्त पौडेलका अनुसार मंगलबार उनलाई एआईजी पदमा बढुवा सिफारिस गरेको हो ।
पोखरेल विशेषगरी गोताखोर तालिम सञ्चालन गर्ने दक्ष प्रहरी अधिकृतका रूपमा परिचित छन् । उनले सशस्त्र प्रहरीभित्र गोताखोर तालिमलाई व्यवस्थित र प्रभावकारी बनाउन महत्वपूर्ण भूमिका खेलेका थिए । विपद् उद्धार, नदी तथा जलक्षेत्रमा हुने खोज तथा उद्धार कार्यमा उनले पुर्याएको योगदान उल्लेखनीय मानिन्छ। इमान्दार, कर्तव्यनिष्ठ र अनुशासित प्रहरी अधिकृतका रूपमा परिचित पोखरेल संगठनभित्र सुशासन स्थापित गर्ने अधिकृतका रूपमा चिनिन्छन् । यसअघि कोशी प्रदेश अन्तर्गत सुनसरीको बराह बाहिनी पकलीको बाहिनीपति रहँदा उनले सीमा क्षेत्रमा हुने चोरी तस्करी नियन्त्रणमा उल्लेखनीय सफलता हासिल गरेका थिए।
