काठमाडौँ : नेपाली काँग्रेसका सचेतक निश्कल राईले प्रधानमन्त्री बालेन साहले नेपालले पनि भारतको भूमि मिचेको छ भन्ने अभिव्यक्ति तथ्यहीन भएको टिप्पणी गरेका छन् । आइतवार संघीय संसद् भवन सिंहदरबार परिसरमा सञ्चारकर्मीले राखेका जिज्ञासाको जवाफ दिने क्रममा उनले उक्त कुरा बताएका हुन् । सचेतक राईले सार्वभौम संसद्मा प्रधानमन्त्री साहले बिनातथ्य कुरा गर्नु अशोभनीय भएको पनि बताए । राईले भने, ‘प्रधानमन्त्रीज्यूले सार्वभौमसत्ता सम्पन्न प्रतिनिधिहरू भएको ठाउँमा आएर हामीले पनि भारतको सीमा मिचेका छौँ भनेर तथ्यहीन कुरा गर्नुभयो। आपत्ति छ ।’ सचेतक राईले प्रधानमन्त्री साहले संसद्मा उठेका प्रश्नको चित्तबुझ्दो जवाफ दिन नसकेको तर्क गरे ।
