काठमाडौं : पश्चिम नवलपरासीको सुस्ता क्षेत्रमा नारायणी नदीको कटान नियन्त्रणका लागि निर्माणाधीन तटबन्धको काममा भारतीय सशस्त्र सीमा बल (एसएसबी) ले आपत्ति जनाएको छ । सीमा विवादित क्षेत्र रहेको भन्दै भारतीय पक्षले थप भौतिक संरचना निर्माण नगर्न मौखिक आग्रह गरेको जनाइएको छ।
जिल्ला प्रशासन कार्यालयका अनुसार संयुक्त सीमा गस्तीका क्रममा भारतीय पक्षले उक्त विषय उठाएको थियो। त्यसपछि सम्बन्धित निकायमार्फत गृह मन्त्रालयलाई जानकारी गराइएको छ।
हाल सुस्ता गाउँपालिका–५ मा करिब १ किलोमिटर तटबन्ध निर्माणको काम भइरहेको छ, जसको अधिकांश काम सम्पन्न भइसकेको छ। तर त्यससँगै जोडिएको १३२ मिटर क्षेत्रमा भने माथिल्लो तहको सहमति प्राप्त गरेपछि मात्र निर्माण अघि बढाउन भारतीय पक्षले आग्रह गरेको छ।
नारायणी नदीको बाढी र कटानका कारण स्थानीय बस्ती तथा खेतीयोग्य जमिन जोखिममा पर्दै आएकाले तटबन्ध निर्माणलाई स्थानीयवासीले अत्यन्त आवश्यक पूर्वाधारका रूपमा लिएका छन्। स्थानीयहरूले निर्माणस्थल नेपाली भूमि भित्रै रहेको दाबी गर्दै रोकावटप्रति असन्तुष्टि जनाएका छन्।
तटबन्ध निर्माणका लागि छुट्टाछुट्टै ठेक्का सम्झौता भइसकेको र बजेटसमेत विनियोजन भइसकेको जनाइएको छ। स्थानीयवासीले निर्माण कार्य अविलम्ब सुचारु गर्न सरकारबाट आवश्यक पहल हुनुपर्ने माग गरेका छन्।
