काठमाडौं : नेपाली पुरुष क्रिकेट टोली एसियन गेम्समा छनोट भएको छ । समूह ‘ए’ अन्तर्गतको खेलमा मलेसियाले चीनलाई हराएपछि नेपाल समूह ‘ए’ बाट शीर्ष २ हुँदै सेमिफाइनल पुग्दै एसियन गेम्समा छनोट भएको हो ।
समूह ‘ए’ अन्तर्गतको दोस्रो खेलमा मलेसियाले चीनलाई ९ विकेटले पराजित गरेको हो । समूह ‘ए’ मा ३ टोली मात्रै हुँदा चीनले लगातार २ हार बेहोर्दा मलेसिया र नेपाल सेमिफाइनल हुँदै एसियन गेम्समा छनोट भएका हुन् । नेपालले समूह चरणको पहिलो खेलमा आइतबार चीनलाई २२१ रनले हराएको थियो ।
नेपालले समूह चरणको अन्तिम खेल बिहीबार मलेसियासँग खेल्दै छ । यो खेलबाट समूह ‘ए’ को विजेताको टुंगो लाग्नेछ । एसियन गेम्स छनोटमा ७ टोलीलाई २ समूहमा विभाजन गरी खेलाइएको थियो । २ समूहका शीर्ष २ ले सेमिफाइनल हुँदै एसियन गेम्सका लागि छनोट हुनेछन् । नेपाली महिला क्रिकेट टोली भने तेस्रो स्थानको खेलमा चीनसँग पराजित हुँदै एसियन गेम्समा छनोट हुन असफल भएको थियो ।
