काठमाण्डौ। नेकपा एमालेका बागमती प्रदेशबाट प्रतिनिधित्व गर्ने केन्द्रीय सदस्यहरूले तत्काल पार्टी पुनर्गठन नगरे र नेतृत्व परिवर्तन नगरे तल जान नसकिने धारणा राखेका छन् । शनिबारबाट सुरू भएको प्रदेशगत छलफल अन्तर्गत शनिबार बागमती प्रदेशको बैठकमा धारणा राख्ने अधिकांश केन्द्रीय सदस्य, जिल्ला अध्यक्षहरूले पुनर्गठनको पक्षमा विचार राखेको बागमती प्रदेश संगठन कमिटीकी सहसचिव भक्तकुमारी लामाले जानकारी दिइन् ।
‘आज धारणा राख्ने ८० प्रतिशतभन्दा बढी नेताहरूले पुनर्गठनको पक्षमा धारणा राख्नुभएको छ,’ लामाले लालबिहानीसँग भनिन्, ‘केही केन्द्रीय सदस्य र जिल्ला नेताहरूले अध्यक्ष केपी शर्मा ओलीलाई मात्रै दोष दिएर अरू उम्कन नमिल्ने, परिणामप्रति सबै तहका नेता–कार्यकर्ता उत्तिकै जिम्मेवार हुनुपर्ने धारणा राख्नुभएको छ ।’ केन्द्रीय सदस्य गोकुल बास्कोटाले अविलम्ब नेतृत्व परिवर्तन गर्नुपर्ने धारणा राखेका थिए ।
उनले पहिलो र दोस्रो पुस्ताका नेताहरूले बिदा लिएर तेस्रो पुस्तामा नेतृत्व हस्तान्तरण हुनुपर्ने धारणा राखेका थिए ।
‘तर्कवितर्क नगरी अविलम्ब पार्टी पुनर्गठन हुनुपर्छ र नेतृत्व तेस्रो पुस्तालाई दिनुपर्छ,’ उनले भनेका थिए ।
केन्द्रीय सदस्य आनन्द पोखरेलले पार्टी पुनर्गठन सम्बन्धी मार्गचित्र प्रस्तुत गर्दै लिखित प्रस्ताव नै बैठकमा राखेका थिए । उनले अहिलेको परिणामप्रति जिम्मेवारीबोध गर्दै पार्टी अध्यक्ष केपी शर्मा ओलीले नेतृत्व हस्तान्तरण गर्नुपर्ने धारणा राखे । उनले पार्टी रूपान्तरणको पहिलो सर्त पुनर्गठन नै भएको धारणा राखेका थिए ।
केन्द्रीय सदस्य कृष्णभक्त पोखरेलले पनि नेतृत्व पुनर्गठनको पक्षमै धारणा राखेका थिए। निर्वाचन परिणाम, एमाले आन्दोलनको गम्भीर समीक्षा गरी उपयुक्त कदम चाल्नुपर्ने सुझाव दिएका थिए । त्यसको प्रस्थानविन्दु पार्टी पुनर्गठन भएको धारणा राखेका थिए । कतिपयले नाम लिएर अध्यक्षलाई पद छाड्न भनेका छन्। कतिपयले नाम नलिएर पुनर्गठनमा जोड दिएका छन्,’ एक नेताले भने ।
केन्द्रीय सदस्य प्रदीप कटुवालले अहिलेको अवस्था आउनुमा अध्यक्ष ओलीलाई मात्रै जिम्मेवार ठहर्याउने कुरा गलत भएको भन्दै सबैले जिम्मेवारीबोध गर्नुपर्ने धारणा राखेका थिए ।
नेता महेश बर्तौलाले अध्यक्ष ओलीलाई गलहत्याएर निकाल्न नमिल्ने बताउँदै परिस्थितिको ठोस, यथार्थपरक समीक्षाको खाँचो रहेको बताएका थिए ।
आज बोल्ने अधिकांश नेताहरूले पार्टी पुनर्गठनमा जोड दिँदै अविलम्ब त्यसको सन्देश दिनुपर्ने बताएको अर्का एक नेताले बताए ।
पुनर्गठन नगरी तल जान सकिँदैन भन्दै त्यसको थालनी अब बस्ने केन्द्रीय कमिटी बैठकले गर्नुपर्ने, अन्यथा तल क्षय रोक्न नसकिने धारणा राखेका थिए ।
बागमतीबाट प्रतिनिधित्व गर्ने केन्द्रीय सदस्य र जिल्ला नेताहरूको धारणा सुनेपछि उपाध्यक्ष विष्णु पौडेल उत्साहित देखिएका छन् ।
उनले पार्टीको गुमेको जनमत र प्रतिष्ठा पुनर्स्थापित हुनेगरी पार्टी पुनर्गठनको अभिभारा पूरा गर्न आफूहरू सक्षम हुने विश्वास व्यक्त गरेका छन् ।
महासचिव शंकर पोखरेलले पनि आजको कार्यक्रममा निर्वाचन समीक्षा र पार्टी पुनर्गठनका सन्दर्भमा महत्त्वपूर्ण सुझाव प्राप्त भएको बताएका छन् ।
‘बागमती प्रदेश संगठन कमिटीको दोस्रो बैठक तथा बागमती प्रदेशको आयोजनामा निर्वाचन समीक्षा तथा पार्टी पुनर्गठनका सम्बन्धमा सुझाव संकलन कार्यक्रम सम्पन्न भयो । सुझाव संकलन कार्यक्रममा निर्वाचन समीक्षा र पार्टी पुनर्गठनका सन्दर्भमा महत्त्वपूर्ण सुझाव प्राप्त भएका छन्,’ उनले भनेका छन् ।
