को बन्ला ३०औँ मुख्यसचिव ? १० सचिव दाबेदार

काठमाडौँ । नेपाल सरकारका २९औँ मुख्यसचिव सुमनराज अर्याल उमेरहदका कारण यही असार २६ गतेबाट अनिवार्य अवकाशमा जाने भएपछि नयाँ मुख्यसचिव को हुने भन्ने चर्चा प्रशासन वृत्तमा सुरु भएको छ । प्रशासनिक क्षेत्रको सबैभन्दा उच्च पद मुख्यसचिवको जिम्मेवारी सम्हाल्न सचिवहरू आ–आफ्नो तर्फबाट प्रयास गरिरहेका छन् ।

३०औँ मुख्यसचिव बन्नका लागि १० सचिव दाबेदार छन् । निजामती सेवा ऐनको दफा १९(२)(क) मा ‘राजपत्राङ्कित विशिष्ट श्रेणीको मुख्य सचिवको पदमा बढुवा गर्दा बहालवाला सचिवमध्येबाट नेपाल सरकारले ज्येष्ठता र कार्यकुशलताको आधारमा छनोट गरी बढुवा गर्नेछ’ भन्ने लेखिएको छ । ऐनमा रहेको यही प्रावधानमा पर्ने सचिवहरू मुख्य सचिवमा बढुवा हुन लबिङ गरिरहेका छन् ।

सचिवहरू २ तरिकाबाट अनिवार्य अवकाशमा जान्छन्– एउटा ५ वर्षे सेवा अवधि पुगेर र अर्को, ५८ वर्षे उमेरहदका कारण ।

निजामती सेवा ऐन, २०४९ को दफा ३३ को उपदफा (१) बमोजिम मुख्यसचिव लगायत सम्पूर्ण निजामती कर्मचारीहरू ५८ वर्ष उमेर पूरा भएपछि सेवाबाट अनिवार्य अवकाश पाउँछन् । उमेर बाँकी नै रहे पनि मुख्यसचिवको पदावधि ऐनको दफा १७ को उपदफा (२) बमोजिम बढीमा ३ वर्ष हुन्छ ।

वरिष्ठताका आधारमा मुख्यसचिवको बढुवा नियुक्ति गरियो भने किरणराज शर्मा २०८४ कात्तिक अन्तिमसम्म पदमा रहनेछन्, तर उनी मुख्यसचिव भएनन् भने ५ वर्षे सेवाअवधिका कारण आगामी साउन ४ गते अनिवार्य अवकाशमा जानेछन् ।