काठमाडौं : नेकपा एमाले संसदीय दलको बैठकले पार्टी उपाध्यक्ष विष्णु पौडेललाई गैरकानुनी रूपमा पक्राउ गरेको निष्कर्ष निकालेको छ । मंगलबार पार्टी कार्यालयमा बसेको दलको बैठकले पूर्व अर्थमन्त्रीसमेत रहेका पौडेललई बिना सर्त रिहा गर्न माग गरेको छ ।
‘पार्टी उपाध्यक्षलाई गैरकानुनी, गैर न्यायिक र प्रतिशोधपूर्ण ढंगले पक्राउ गरियो । उहाँसँग पीएसओ छ। उहाँ काठमाडौं आउने कुरा थाहा हुँदा-हुँदै रातारात सार्वजनिक माध्यमबाट काठमाडौं ल्याइयो । त्यो कानुनी राज्यको बर्खिलापमा छ। संदसीय दलले त्यसको घोर भर्त्सना गरेको छ । बिना सर्त रिहाइको माग गरेको छ,’ एमालेका प्रमुख सचेतक ऐन महरले जानकारी दिए ।
रास्वपा नेतृत्वको सरकार तानाशाही र अधिनायकवादी बाटोमा हिंडेको उनको भनाइ छ । ‘सरकारको नीति राष्ट्रको विरोधमा रहेको देखिन्छ । सरकारका त्यस्ता व्यवहारविरुद्धमा एमाले सदनमा सशक्तरूपमा उत्रिन्छ,’ उनले भने । उनले सरकारले आतंक सिर्जना गरेको भन्दै कुनै पनि तह र तप्काका नागरिक अहिले सुरक्षित नरहेको बताए । उनले महँगी र मूल्यवृद्धिले पनि आकाश छोएको भन्दै सरकारको विरोध गरे ।
