काठमाडौं : विश्वकप २०२६ को रोमान्चक खेलमा अमेरिका टर्कीसँग ३-२ ले पराजित भएको छ । समूह ‘डी’ को आफ्नो अन्तिम खेलमा सह-आयोजक संयुक्त राज्य अमेरिका (USA) टर्कीसँग ३-२ गोलले स्तब्ध भयो ।
लस एन्जलस स्टेडियम (सोफाइ स्टेडियम) मा ७०,४९२ दर्शकमाझ खेलिएको यस उच्च प्रतिस्पर्धात्मक खेलमा टर्कीले थप गरिएको अतिरिक्त समयको आठौँ मिनेटमा गोल गर्दै सनसनीपूर्ण जित निकाल्यो ।
यसअघि नै लगातार दुई खेल जितेर नकआउट चरण (राउन्ड अफ ३२) मा स्थान पक्का गरिसकेको अमेरिकी टोलीले आज धेरैजसो वैकल्पिक खेलाडीहरूलाई मैदान उतारेको थियो।
अर्कोतर्फ, प्रतियोगिताबाट बाहिरिसकेको टर्कीले भने प्रतिष्ठाका लागि खेल्दै सान्त्वना जित हात पार्यो। खेल सुरु भएको तेस्रो मिनेटमै अमेरिकाका अस्टन ट्रस्टी (Auston Trusty) ले गोल गर्दै घरेलु दर्शकलाई उत्साहित बनाएका थिए।
खेलको १० औँ मिनेटमा टर्कीका युवा स्टार आर्दा गुलेर (Arda Güler) ले गोल गर्दै खेललाई १-१ को बराबरीमा ल्याए। त्यसपछि ३१ औँ मिनेटमा बारिस अल्पेर यिल्माज (Barış Alper Yılmaz) ले गोल गरेपछि टर्कीले पहिलो हाफमा २-१ को अग्रता लियो ।
दोस्रो हाफ सुरु भएको केही मिनेटमै अर्थात् ४९ औँ मिनेटमा अमेरिकाका सेबास्टियन बर्हाल्टर (Sebastian Berhalter) ले उत्कृष्ट गोल गर्दै खेल २-२ को रोमाञ्चक स्थितिमा पुर्याए । खेल बराबरीमा सकिने अनुमान गरिरहँदा, इन्जुरी समयको ९०+८ मिनेटमा टर्कीका कान आयहान (Kaan Ayhan) ले निर्णायक गोल गर्दै टर्कीलाई ३-२ को जित दिलाए ।हारका बाबजुद अमेरिका समूह ‘डी’ को विजेता बन्दै अर्को चरणमा प्रवेश गरिसकेको छ भने टर्कीको विश्वकप यात्रा यहीँ सकिएको छ । अब नकआउट चरणमा अमेरिकाको सामना बोस्निया र हर्जगोभिनासँग हुनेछ ।
