काठमाडौँ । तत्कालीन सभापति शेरबहादुर देउवा र उनी नेतृत्वको केन्द्रीय समितिको असहमतिका बिच गत पुस २७ देखि ३० गतेसम्म तत्कालीन महामन्त्रीद्वय गगन थापा र विश्वप्रकाश शर्माको अगुवाइमा भएको विशेष महाधिवेशनबाट नयाँ नेतृत्व चयन भएपछि चर्किएको कांग्रेसभित्रको विवाद अझै साम्य भएको छैन ।
तथापि काठमाडौँमा सम्पन्न विशेष महाधिवेशनबाट सभापतिमा चयन भएका गगन थापाले विवाद समाधानका लागि वार्ता र संवाद गर्न नयाँ–नयाँ नेतालाई जिम्मेवारी दिएर प्रयास भने जारी राखेका छन् ।
‘नेपाली कांग्रेसको आन्तरिक राजनीति र समसामयिक विषयमा पार्टीका आदरणीय नेता डा.शेखर कोइरालासँग भेटघाट र छलफल,’ फेसबुकमा डा. कोइरालासँगको तस्बिरसहित महामन्त्री घिमिरेले लेखेका छन् । कांग्रेसमा विशेष महाधिवेशनबाट आएको नेतृत्वलाई निर्वाचन आयोगले मान्यता दिएको थियो । त्यसविरुद्ध देउवा र डा. शेखर समूह सर्वोच्च अदालतमा रिट लिएर पुगे । तर, सर्वोच्चले पनि गत वैशाख ४ गते विशेष महाधिवेशनबाट आएको कार्यसमितिलाई नै आधिकारिकता दियो । त्यसपछिबाट शुक्रबारसम्म भएका भेटमा संस्थापनबाट ४ नेता खटिए पनि उपलब्धि भने अहिलेसम्म शून्य छ ।
सर्वोच्चबाट आफ्नो पक्षमा फैसला आएपछि थापाले वैशाख ६ गते निवर्तमान कार्यवाहक सभापति पूर्णबहादुर खड्कालाई उनकै निवास गोल्फुटारमा पुगेर भेटेका थिए ।
