काठमाडौं । वैदेशिक रोजगारीका लागि दक्षिण कोरिया पुगेर फर्किएका बिनोजकुमारले पसिना बगाएर कमाएको रकम रातभरमै गुमाउनु परेको छ । सामाजिक सञ्जाल फेसबुकमा देखिने ‘लोभलाग्दो’ विज्ञापनको लिंकमा क्लिक गर्दा उनका तीनवटा बैंक खातामा रहेको २७ लाख ८१ हजार रुपैयाँ लुटिएको हो ।
७ जुलई २०२५ को साँझ बिनोजकुमार आफ्नो घरमा बसेर फेसबुक चलाइरहेका थिए । त्यसै क्रममा उनले ‘घर बसी बसी आम्दानी गर्न सकिने’ ब्यहोराको एउटा पोस्ट देखे । पैसा कमाउने लोभमा परेर उनले उक्त पोस्टमा रहेको लिंकमा क्लिक गरे । लिंक क्लिक गरे पनि कुनै पेज खुलेन, त्यसपछि उनले फेसबुक बन्द गरेर सुते ।
भोलिपल्ट अर्थात् जुलाई ८ को बिहान उठेर मोबाइल हेर्दा उनी छाँगोबाट खसेजस्तै भए । उनको मोबाइलमा बैंकबाट रकम बाहिरिएको एसएमएसको ओइरो थियो । ७ जुलाईको रातिदेखि ८ जुलाईको बिहानसम्मको बीचमा उनको तीनवटै बैंक खाताबाट पटक-पटक गरी कूल २७ लाख ८१ हजार रुपैयाँ गायब भइसकेको थियो ।
प्रहरीको साइबर ब्युरोले गरेको प्राविधिक अनुसन्धान र बैंकहरूबाट प्राप्त स्टेटमेन्ट अनुसार, बिनोजकुमारको खाताबाट चोरिएको रकम विभिन्न व्यक्तिहरूको बैंक खाता र डिजिटल वालेटमा पुगेको देखिन्छ ।
अभियोगपत्रका अनुसार सबैभन्दा ठुलो हिस्सा अर्थात् २७ लाख ४१ हजार रुपैयाँ ७४ पटक गरी सिराहाका १९ वर्षीय आशिक यादवको नबिल बैंकको खातामा पुगेको छ । बाँकी रकममध्ये २० हजार रुपैयाँ बागलुङकी २६ वर्षीया सीता थापा र अर्को २० हजार रुपैयाँ पर्साका २१ वर्षीय कृष्णनन्दनकुमार कुशवाहाको खल्ती वालेटमा ट्रान्सफर भएको छ ।
प्रहरीले ती व्यक्तिहरूको केवाईसी विवरण र डिजिटल बैंकिङ स्टेटमेन्टलाई मुख्य प्रमाणका रूपमा पेस गरेको छ । जिल्ला प्रहरी परिसर भद्रकालीले गरेको अनुसन्धानका आधारमा सरकारी वकिल कार्यालयले तीनै जना आरोपी विरुद्ध ठगी सम्बन्धी कसुरमा मुद्दा दायर गरेको छ । आरोपीहरू हाल फरार रहेको भन्दै उनीहरूलाई मुलुकी अपराध संहिता, २०७४ को दफा २४९ को उपदफा (१) र (२) बमोजिमको कसुरमा कारबाही माग गरिएको छ ।
अभियोगपत्रमा आरोपीहरूलाई सोही संहिताको दफा २४९ को उपदफा (३) को खण्ड (ग) अनुसार सात वर्षसम्म कैद र ७० हजार रुपैयाँसम्म जरिबाना गर्न माग दाबी गरिएको छ । साथै, पीडित बिडारीको गुमेको २७ लाख ८१ हजार रुपैयाँ दफा २५४ बमोजिम आरोपीहरूबाटै असुल गरी भराउन र अपराध पीडित संरक्षण ऐन, २०७५ अनुसार पीडित राहत कोषमा क्षतिपूर्ति शुल्क समेत भराउन माग गरिएको छ ।
(सचेतनाको लागी फेरी रि पोष्ट गरिएको)
