भालुबाङ्ग,श्रावण २६ । लुम्बिनी प्रदेशका मुख्यमन्त्री चेतनारायण आचार्यले विश्वासको मत लिने मिति सारेका छन् । साउनको अन्तिमतिर विश्वासको मत लिने तयारीमा रहेका उनले अब भदौको पहिलो सातातिरमात्र लिने योजना बनाएका छन् ।
केही प्रदेश सभा सदस्य बाहिर रहेका कारण भदौको पहिलो साता विश्वासको मत लिने तयारी गरिएको उनले लाल बिहानीलाई जानकारी दिए ।
यसैबिच, नेकपा एमाले र नेपाली कम्युनिस्ट पार्टीबिच भएको सहमतिअनुसार प्रदेश सरकारको नेतृत्व गर्ने एमालेले मुख्यमन्त्रीमा आचार्यलाई नै निरन्तरता दिने निर्णय गरिसकेको छ ।
नेकपाका लुम्बिनी प्रदेशका निवर्तमान संयोजक तथा पूर्वमन्त्री सुदर्शन बरालले राप्रपालाई सरकारमा सहभागी गराउने वा नगराउने विषय केन्द्रबाट छिटै टुङ्ग्याउनुपर्ने बताए । उनले अन्य प्रदेशको अवस्थासमेत हेरेर केन्द्रले निर्णय गर्नुपर्ने भन्दै लुम्बिनीमा पनि केन्द्रको निर्णय कुरिरहेको प्रस्ट पारे ।
बागमतीसहित अन्य प्रदेशमा राप्रपासँग सहकार्य गर्ने विषयमा छलफल भइरहेकाले त्यसको प्रभाव लुम्बिनीमा पनि पर्न सक्ने सत्ता गठबन्धनका नेताहरूको बुझाइ छ । लुम्बिनी प्रदेश सभामा राप्रपाका चार सांसद छन् । राप्रपाका प्रदेशसभा प्रमुख सचेतक मिना श्रेष्ठले भने सरकारमा सहभागी हुने वा नहुने विषयमा लुम्बिनी प्रदेशमा औपचारिक छलफल नभएको लालबिहानीलाईलाई बताइन् ।
लुम्बिनी प्रदेशका मुख्यमन्त्री आचार्यले पनि राप्रपा सरकारमा आउन चाहे सहकार्य गर्न सकिने सङ्केत गरेका छन् । उनले सरकारमा राप्रपा सहभागी हुने अवस्था आए सँगै लैजान सकिने बताए । तर, अहिलेसम्म यस विषयमा औपचारिक र स्पष्ट छलफल भने नभएको उनको भनाइ छ ।
लुम्बिनी प्रदेश सभामा हाल ८३ सदस्य छन् । बहुमतका लागि कम्तीमा ४२ सांसदको समर्थन आवश्यक पर्छ । प्रदेशसभामा एमालेका २९ र नेकपाका सभामुखसहित १३ सांसद छन् । सभामुखले मतदान गर्न नपाउने भएकाले यी दुई दलको मात्रै समर्थनले बहुमत पुग्दैन । त्यसैले सरकारलाई थप दलको समर्थन आवश्यक देखिन्छ ।
