सुलीचौर, श्रावण ३१ : रोल्पाको लुङ्ग्री गाउँपालिका-५ धैरेनीमा पहिरोले घर पुरिँदा एक वृद्धाको मृत्यु भएको छ । जिल्ला प्रहरी कार्यालय रोल्पाका अनुसार साउन ३० गते राति परेको अविरल वर्षाका कारण लुङ्ग्री गाउँपालिका-५ धैरेनीमा पहिरो खसेर ७२ वर्षीया अम्मी गुरुङको घर पुरिएको हो ।
घरमा सुतिरहेको अवस्थामा माथिबाट एक्कासि पहिरो खसेपछि गुरुङ पुरिएकी थिइन्। घटनाको जानकारी साउन ३१ गते बिहान करिब ३ बजे प्रहरी चौकी किलाचौर रोल्पामा प्राप्त भएको थियो।
सूचना प्राप्त हुनासाथ प्रहरी टोली घटनास्थलमा पुगेर स्थानीयवासीको सहयोगमा खोज तथा उद्धार कार्य सुरु गरेको प्रहरीले जनाएको छ। पहिरोमा पुरिएकी गुरुङको टाउकोको भाग मात्र देखिएको अवस्थामा उद्धारको प्रयास गरिएको थियो।
