काठमाण्डौ, भदौ ६ : त्रिभुवन विश्वविद्यालय (त्रिवि) सेवा आयोगबाट सञ्चालित सामाजिक अध्ययन विषयको उपप्राध्यापक पदको सिफारिसमाथि प्रश्न उठेको छ । फर्जी कागजात पेस गरेका उम्मेदवारलाई शिक्षा शास्त्र सङ्कायतर्फ सामाजिक अध्ययन विषयमा उपप्राध्यापकमा नियुक्त गरेको भन्दै उच्च अदालत पाटनमा उजुरी परेपछि यो विषय सार्वजनिक भएको हो ।
निवेदक तेजप्रसाद पौडेलले सेवा आयोगको खुला प्रतियोगितात्मक लिखित परीक्षामा आफू १ नम्बरमा नाम निकाल्न सफल भए पनि अन्तरवार्तापछि प्रकाशित नतिजामा विपक्षी सुदर्शन कडेललाई गलत अनुभवको अङ्क जोडेर १ नम्बरमा सिफारिस गरिएको रिटमा उल्लेख छ । कडेलले वीरेन्द्र बहुमुखी क्याम्पस चितवनमा अध्यापन गराएको भनी पेस गरेको आंशिक सेवाको झुठा सिफारिसका आधारमा ५ अङ्क बढी पाएर नतिजा प्रभावित पारेको पौडेलको आरोप थियो ।
त्रिवि सेवा आयोगले विज्ञापन नम्बर ८२३/०७७/०७८ अन्तर्गत सामाजिक अध्ययन विषयको १ सिट खुला उपप्राध्यापक पदका लागि लिएको परीक्षाको लिखित नतिजामा आफू १ नम्बरमा नाम निकाल्न सफल भए पनि नक्कली अनुभव पत्रका आधारमा आफूलाई वैकल्पिकमा पारिएको दाबी रिट निवेदक तेजप्रसाद पौडेलको छ । एक नम्बरमा आएको व्यक्ति कसरी वैकल्पिकमा पर्यो भनी खोजतलास गर्दा अर्का प्रतिस्पर्धी सुदर्शन कडेलले आंशिक सेवा बापतको झुटा कागजात पेस गरी प्रतिवर्ष ०.५ अङ्कका दरले थप ५ अङ्क जोडेर नतिजा प्रभावित पारेको खुलासा भएको पौडेलको भनाइ छ ।
