काठमाडौं, भदौ ६ : निर्वाचन आयोगले मतदाता नामावलीलाई शुद्ध, विश्वसनीय र वस्तुगत बनाउने उद्देश्यले आगामी १ असोजमा आफ्नो वेबसाइटमा नामावली प्रकाशन गर्ने भएको छ । नामावलीमा नाम, थर, उमेर वा ठेगाना लगायतका विवरणमा त्रुटि भएमा, कसैले झुट्टा विवरण दिई नाम समावेश गरेको भए वा कुनै मतदाताको नाम एकभन्दा बढी स्थानमा देखिएमा त्यसलाई सच्याउन र एउटा मात्र कायम गर्न आयोगले एक विज्ञप्तिमार्फत अनुरोध गरेको छ ।
मतदाताहरूले विवरण सच्याउनका लागि आयोगको आधिकारिक वेबसाइट applyvr.election.gov.np मार्फत अनलाइन आवेदन दिन वा सम्बन्धित निर्वाचन कार्यालयमा सम्पर्क गर्न सक्नेछन् ।
निर्वाचनको स्वच्छता, निष्पक्षता र विश्वसनीयता कायम गर्न मतदाता नामावलीको शुद्धता अनिवार्य आधार भएको उल्लेख गर्दै आयोगले विवरण सच्याउने र दोहोरो नाम हटाउने कार्यमा सबै नागरिकबाट सहयोगको अपेक्षा गरेको छ ।
