पोखरा,भदौ १९ : भारतीय पर्यटक सवार कार फेवातालमा खस्दा दुईजनाको मृत्यु भएको छ। शुक्रबार बिहान नियन्त्रण गुमाई फेवातालमा कार खस्दा दुईजना भारतीय पर्यटकको मृत्यु भएको प्रहरीले जनाएको छ।
कार दुर्घटनामा परी भारत बिहार रक्सोलका २६ वर्षीय नवदीप कुमार यादव र सोही ठाउँका वर्ष २६ का प्रियान्सु पाण्डेको उपचारको क्रममा मृत्यु भएको जिल्ला प्रहरी कार्यालय कास्कीले जनाएको छ ।
उद्धार गरी उपचारका लागि गण्डकी मेडिकल कलेजलमा लगिएका अर्का दुईजना भारतीय पर्यटकको उपचारपछि डिस्चार्ज भइसकेका छन् । भारत बिहार मोतिहारी रक्सोलका २७ वर्षीय अनमोल कुमार यादव र सोही गाउँका ३३ वर्षीय सुरज यादव उपचारपछि अस्पतालबाट डिस्चार्ज भइसकेको बताइएको छ ।
बिहान ४:५५ बजेतिर तालमा खसेपछि तत्कादै वडा प्रहरी कार्यालय बैदाम र सशस्त्र प्रहरी बल नेपाल कालिका गणबाट सुरक्षाकर्मी र स्थानीयले उद्धार गरेका थिए । कारलाई क्रेनको सहयोगमा बाहिर निकालिएको थियो ।
