काठमाण्डौ,भदौ २१ : भोटेकोशी बाढीमा लाङटाङ खोला जलविद्युत् आयोजनाबाट हराइरहेकाहरूको खोजी कार्य सकिएको छ । आयोजनाको सुरुङभित्र २ जनाको शवबाहेक केही नभेटिएपछि नेपाली सेना, नेपाल प्रहरी र सशस्त्र प्रहरीको टोलीले खोजी कार्य बन्द गरेको हो ।
स्वतन्त्र ऊर्जा उत्पादकहरूको संस्था, नेपाल (इप्पान)ले उपलब्ध गराएको विवरणअनुसार २० मेगावाट क्षमताको उक्त आयोजनाबाट अझै पनि ३९ जना सम्पर्कविहीन छन् ।
आयोजनाका प्रबन्धक विजयमोहन भट्टराईले शनिबारपछि सुरुङभित्रको खोजी कार्य स्थगित भएको बताए । सुरुङभित्र २ जनाको शवबाहेक केही नभेटिएपछि उद्धार टोलीले थप खोजी आवश्यक नरहेको बताउँदै खोजी कार्य स्थगित गरिएको उनको भनाइ छ ।
आयोजनाको पेनस्टक पाइट काटेर सुरुङभित्र प्रवेश गरी खोज्दा २ जनाको शव भेटिएको थियो । दुवै शव विक्षिप्त अवस्थामा रहेकाले अझै पहिचान हुन नसकेको इप्पानले जनाएको छ । अब डीएनए परीक्षण गरी पहिचान गरेर परिवारलाई हस्तान्तरण गरिनेछ ।
