काठमाण्डौ,भदौ २७ : काठमाडौं उपत्यका सहित देशका विभिन्न जिल्लामा यतिखेर खाना पकाउने एलपी ग्यासको चरम हाहाकार छ । नागरिकहरू खाली सिलिन्डर बोकेर सडकमा भौँतारिरहेका छन्, कोही सडकमै भात पकाएर खाएर त कोही ग्यास देऊ सरकार भन्दै आन्दोलनमै उत्रिएका छन् ।
उपभोक्ताको चुलो नबलेपछि चौतर्फी आलोचना र दबाब थेग्न नसकेर उद्योग, वाणिज्य तथा आपूर्तिमन्त्री गौरीकुमारी यादवले अन्तत: पदबाट राजीनामै दिइन्
बालेन शाह नेतृत्वको सरकार बनेयता साढे पाँच महिनादेखि ग्यासको चरम अभाव भोगिरहेका सर्वसाधारणका लागि विभागीय मन्त्रीको राजीनामा र नयाँ मन्त्री नियुक्तिले ठूलै तरंग त ल्याएको छ, तर आम उपभोक्ताको मनमा भने अझै पनि एउटै अनुत्तरित प्रश्न छ– ‘के मन्त्री फेरिँदैमा नागरिकको घरमा भएको रित्तो सिलिन्डर भरिएर आउँछ ?’
करिब दुई तिहाइ बहुमत सहित शक्तिशाली सरकार बनेपछि चुड्कीकै भरमा आपूर्ति व्यवस्था सहज हुने, सुशासन कायम हुने र दैनिक उपभोग्य वस्तुमा कालोबजारी अन्त्य हुने अपेक्षा गरेका नागरिक अहिले निराश छन् ।
