काठमाण्डौ, भदौ २७ : यूएईलाई ४४ रनले पराजित गर्दै नेपालले एसीसी पुरुष प्रिमियर कपको उपाधि जितेको छ । उपाधि जितेसँगै नेपालले एसिया कपमा पनि आफ्नो स्थान पक्का गरेको छ ।
फाइनलमा नेपालले दिएको ३ सय १४ रनको लक्ष्य पछ्याएको यूएई ४९ दशमलव १ ओभरमा सबै विकेट गुमाउँदै २ सय ६९ रनमा समेटियो ।
यूएईलाई लक्ष्य भेट्नबाट रोक्ने क्रममा करण केसीले तीन, ललित राजवंशीले दुई तथा सन्दीप लामिछाने, रोहित पौडेल, दीपेन्द्रसिंह ऐरी, बसिर अहमद र गुलशन झाले समान एक–एक विकेट लिए ।
यूएईका लागि मध्यक्रममा ब्याटिङ गर्न आएका राहुल चोपडाले १ सय रनको अविजित पारी खेले पनि टोलीलाई जित दिलाउन सकेनन् । आक्रामक सुरुवात गरेको यूएईका लागि सोयब खानले ५२ रनको अर्धशतकीय पारी खेले । ओपनर तनिस सुरीले ४२ तथा हरप्रित भाटियाले ३३ रन बनाए । अन्य ब्याटरले भने उल्लेख्य प्रदर्शन गर्न सकेनन् ।
यसअघि टस जितेर पहिले ब्याटिङ गरेको नेपालले निर्धारित ५० ओभरमा नौ विकेट गुमाउँदै ३ सय १३ रन बनाएको थियो । नेपालका ओपनर आशिफ शेखले १ सय २ रनको शतकीय पारी खेले ।
नेपाललाई उच्च योगफलतर्फ डोर्याउने क्रममा मध्यक्रमका गुलशन झाले ५२ रनको आक्रामक पारी खेले । उनले चार छक्का र तीन चौकाको मद्दतमा ३८ बलमै अर्धशतक पूरा गरेका थिए । ओपनर अर्जुन कुमालले ४३ तथा रोहित पौडेलले ४० रनको महत्वपूर्ण योगदान दिए ।
उपाधि जितेसँगै नेपालले एसिया कपमा आफ्नो स्थान पक्का गरेको छ ।
