काठमाण्डौ,भदौ ३१ : यमनमा सरकारी सेना र हुथी विद्रोहीबीचको संघर्ष पुनः चर्किएको छ, रणनीतिक महत्त्वको ताइज क्षेत्रमा भीषण भिडन्त हुँदा लामो समयदेखि तुलनात्मक रूपमा सुस्त रहेको यमन युद्ध फेरि पूर्ण सैन्य टकरावतर्फ उन्मुख भएको संकेत देखिएको छ ।
पछिल्लो दुई हप्तामा ताइज, पश्चिमी तट, अल–जौफ, मारिब र धालेआमा भएको लडाइँमा कम्तीमा १ सय ९४ जनाको मृत्यु र ८ सय ८० जना घाइते भएको सहायता संस्थाहरूले जनाएका छन् । सरकारी सेनाका अनुसार ताइजका विभिन्न मोर्चामा हुथीको अग्रसरतालाई रोक्दै सेनाले पश्चिमी ताइजतर्फ दबाब बढाएको छ।
यमनी सेनाले शनिबार ताइज र अल–हुदैदाहमा धेरै ‘रणनीतिक’ स्थानहरू पुनः कब्जा गरेको दाबी गरेको छ। सेनाले ताइज र पश्चिमी तटमा हुथीका स्थानहरूमा १५ वटा हवाई आक्रमण गरेको पनि जनाएको छ। ताइजलाई यमनको प्रमुख रणनीतिक गेट मानिन्छ, जसले भित्री क्षेत्रलाई तटसँग जोड्छ।
साउदी नागरिक सुरक्षा निकायले आभा र खमिस मुसैत क्षेत्रका लागि चेतावनी जारी गरे पनि केही समयमै हटाएको थियो। पछिल्ला दिनहरूमा दक्षिणी साउदीका आभा, जाजान, नजरान र खमिस मुसैतमा भएका आक्रमणमा ७३ जनाभन्दा बढी सर्वसाधारण घाइते भएको साउदी नेतृत्वको गठबन्धनले जनाएको छ। संयुक्त राष्ट्रसंघका महासचिव एन्टोनियो गुटेरेसले समेत हुथीको सीमापार आक्रमणले सर्वसाधारण र ऊर्जा पूर्वाधारमा असर परेको भन्दै चिन्ता व्यक्त गरेका छन्।
हुथीले मोचा बन्दरगाह नियन्त्रणमा लिएर बाब अल–मन्देब जलमार्गमा आफ्नो पकड बलियो बनाएपछि लालसागर हुँदै हुने अन्तर्राष्ट्रिय व्यापार र साउदी तेल निर्यात थप संवेदनशील बनेको छ, यो जलमार्गले विश्वको करिब १२ प्रतिशत व्यापार धान्छ भने आईओएमका अनुसार सेप्टेम्बर सुरुदेखि मात्र ८२ हजारभन्दा बढी मानिस विस्थापित भएका छन् र २ हजारभन्दा बढी यमनी जिबुतीतर्फ पलायन भएका छन्।
यमनमा वर्षौंदेखि जारी युद्धले लाखौंलाई मानवीय संकटमा धकेलेको छ। ताइजमा सरकारी सेनाको प्रतिआक्रमण र साउदीमाथि हुथीको हमलाको दाबीले युद्ध नयाँ र थप खतरनाक चरणमा प्रवेश गरेको संकेत गरेको विश्लेषकहरूले बताएका छन्।
