काठमाण्डौ,असौज ६ : प्रधानमन्त्री बालेन्द्र शाह संयुक्त राष्ट्रसंघको महासभामा भाग लिन आज अपरान्ह अमेरिकाको न्युयोर्क जाँदैछन् । राष्ट्रसंघको ८१औं महासभामा भाग लिनका लागि शाह १४ सदस्यीय प्रतिनिधिमण्डलसहित आज अपरान्ह कतार एअरवेजको उडानबाट दोहा हुँदै न्युयोर्क जाने कार्यक्रम छ ।
परराष्ट्र मन्त्रालयले सम्बन्धित कार्यालय, निकायलाई असोज २ गते पठाएको अत्यन्त गोप्य र जरुरी पत्रमा प्रधानमन्त्री शाह आज अमेरिका प्रस्थान गर्ने क्रममा र १० गते काठमाडौं आइपुग्दा त्रिभुवन अन्तर्राष्ट्रिय विमानस्थलमा बिदाई र स्वागत समारोह नहुने जानकारी गराएको छ ।
परराष्ट्रको पत्रमा प्रधानमन्त्री शाह सरकारी निवासबाट गाडीमा सोझै विमानस्थलको ‘टरम्याक’ पुगेर विमान चढ्ने उल्लेख छ । लेखिएको छ, ‘…प्रस्थान तथा आगमनको समयमा अति विशिष्ट कक्ष (भिभिआईपी लाउञ्ज) मा सम्माननीय प्रधानमन्त्रीज्यूको बिदाई तथा स्वागतका लागि विशिष्ट पदाधिकारीज्यूहरुको उपस्थितिको लागि उर्दीको आवश्यकता नरहेको..।’ यसरी लेखिएको पत्रको बोधार्थ नेपाल प्रहरी,सशस्त्र प्रहरी, ट्राफिक प्रहरी कार्यालयलाई दिइएको छ । पत्रमा शिष्टाचार महापाल कुमार खरेलको हस्ताक्षर छ । बिदाइ र स्वागतमा सारा काम धाम छाडी ताँती लागेर एअरपोर्ट जानैपर्ने परम्परा यसरी तोडिनुलाई सकारात्मक पहलका रूपमा लिइएको छ ।
