काठमाण्डौ असौज १५ : नेपाल विद्युत प्राधिकरणले काठमाडौं उपत्यकाको विद्युतीय वितरण लाइनलाई भूमिगत गर्ने कार्य तथा आगामी हिउँदको माग (लोड) व्यवस्थापनका लागि राजधानीका विभिन्न स्थानमा विद्युत् आपूर्ति कटौती गर्ने भएको छ । प्राधिकरणअन्तर्गतको काठमाडौं उपत्यका पश्चिम वितरण प्रणाली सुदृढीकरण आयोजनाले एक सूचना जारी गर्दै आज १५ असोजदेखि २६ असोजसम्म विभिन्न फिडरअन्तर्गतका क्षेत्रमा दैनिक पाँच घण्टासम्म विद्युत् आपूर्ति अवरुद्ध हुने जानकारी दिएको हो ।
आयोजनाका अनुसार कुलेश्वर, बानेश्वर, जोरपाटी, कीर्तिपुर तथा मिनभवन वितरण केन्द्रअन्तर्गत पर्ने स्थानहरूमा निर्धारित मितिमा बिहान १०:०० बजेदेखि दिउँसो ३:०० बजेसम्म लाइन काटेर प्राविधिक कार्य अगाडि बढाइनेछ ।
प्राधिकरणद्वारा सार्वजनिक तालिकाअनुसार आज कुलेश्वर वितरण केन्द्रको सतुङ्गल फिडरअन्तर्गत बौथाली चोक वरिपरिका क्षेत्र तथा १६ असोजमा कीर्तिपुर वितरण केन्द्रको मच्छेगाउँ फिडरअन्तर्गत दोभान चोक र खुसी चोक क्षेत्रमा विद्युत् अवरुद्ध हुनेछ ।
त्यस्तै, १७ असोजमा जोरपाटी वितरण केन्द्रअन्तर्गत मूलपानी स्वीचिङ, १८ असोजमा कुलेश्वरको बलम्बु फिडरअन्तर्गत बर्गर हाउस/गुर्जुधारा क्षेत्र, २० असोजमा जोरपाटीको मूलपानी फिडरअन्तर्गत बाबा चोक र मिलन चोक क्षेत्र तथा २१ असोजमा कुलेश्वरकै बलम्बु फिडरअन्तर्गत पीएसएसदेखि खाद्दु खोलासम्म बिजुली जानेछ ।
यसैगरी, २२ असोजमा बानेश्वर वितरण केन्द्रको कोटेश्वर फिडरअन्तर्गत कोटेश्वर-बालकुमारी क्षेत्र, २४ असोजमा बानेश्वरकै पशुपति फिडरअन्तर्गत सिफल क्षेत्र, २५ असोजमा कुलेश्वरको सतुङ्गल फिडरअन्तर्गतका क्षेत्र (धौलागिरी आवास क्षेत्र) र २६ असोजमा मीनभवन वितरण केन्द्रको धोबीखोला फिडरअन्तर्गत धोबीखोला क्षेत्रमा विद्युत् आपूर्ति बन्द रहनेछ ।
पछिल्लो अध्यावधिक: असोज १५, २०८३ ९:१६
