काठमाण्डौ,असौज १८ : युएईका क्राउन प्रिन्स शेख हमदान बिन मोहम्मदले फ्लाईदुबईका भारतीय पाइलट स्मित मच्छारलाई भेट्न शनिबार अस्पताल पुगेका छन् । क्राउन प्रिन्स शेख हमदानले अस्पतालमै पुगेर पाइलट मच्छारको अदम्य साहस र कर्तव्यनिष्ठताको उच्च प्रशंसा गरे ।
उडानका क्रममा को-पाइलटले गरेको साङ्घातिक आक्रमण विफल पार्ने क्रममा पाइलट मच्छार गम्भीर घाइते भएका थिए । घटनालगत्तै सुरुमा साउदी अरेबियामा उपचार गराइएका उनलाई थप उच्च स्तरीय उपचारका लागि युएईको राजधानी आबुधाबी ल्याइएको भारतीय दूतावासले जनाएको छ ।
युएईका क्राउन प्रिन्स शेख हमदानले सामाजिक सञ्जाल ‘एक्स’ (ट्विटर) मार्फत भेटघाटका तस्बिरहरू सार्वजनिक गर्दै पाइलट मच्छारले देखाएको असाधारण साहस, जिम्मेवारी र मानव जीवनप्रतिको प्रतिबद्धताको मुक्तकण्ठले प्रशंसा गरेका छन्। भेटका क्रममा क्राउन प्रिन्सले उनलाई अँगालो हाल्दै आत्मीय सम्मान व्यक्त गरेका थिए ।
पाइलट मच्छारले देखाएको यस असाधारण तदारुकताको अहिले विश्वभर प्रशंसा भइरहेको छ। अमेरिकी राष्ट्रपति डोनाल्ड ट्रम्प तथा इजरायली प्रधानमन्त्री बेन्जामिन नेतन्याहुले समेत उनको कदमको सराहना गर्दै उनलाई ‘नायक’ (हिरो) को संज्ञा दिएका छन्।
