काठमाडौं, ११ साउन — काठमाडौंको माछापोखरी क्षेत्रबाट एक महिलाको गलाबाट सुनको सिक्री लुट्ने कार्यमा संलग्न दुई जनालाई प्रहरीले पक्राउ गरेको छ। पक्राउ पर्नेमा तारकेश्वर नगरपालिका–८ जरङ्खु निवासी २१ वर्षीय कौशल बस्नेत र २६ वर्षीय मिलन तामाङ रहेका छन्। प्रहरीले जनाएअनुसार, शनिबार साँझ करिब ६:३० बजे ती दुई जनाले माछापोखरी क्षेत्रमा हिँडिरहेकी एक महिलालाई पछ्याउँदै उनको गलाबाट २ तोला २५ लाल सुनको सिक्री लुटेका थिए। उक्त सिक्रीको मूल्य हालको बजार अनुसार करिब ४ लाख ३८ हजार रुपैयाँ रहेको प्रहरीको भनाइ छ।
घटना लगत्तै सक्रिय बनेको प्रहरी टोलीले खोजी अभियान सञ्चालन गर्दै राति १२:३२ बजे उनीहरूलाई माछापोखरी क्षेत्रमै पक्राउ गरेको हो। बालाजु प्रहरी वृत्तबाट खटिएको टोलीले पक्राउ गरेपछि उनीहरूबाट लुटिएको सुनको सिक्रीसहित दुई थान मोबाइल फोन पनि बरामद गरिएको छ। जिल्ला प्रहरी परिसर काठमाडौंका प्रवक्ता एसपी अपीलराज बोहराका अनुसार, लुटपाटमा संलग्न गिरोहमाथि थप अनुसन्धान भइरहेको छ। लुटपाट नियन्त्रण गर्न प्रहरीले थप निगरानी र गस्ती बढाउने तयारीसमेत गरेको छ।
