११ साउन, काठमाडौं — अस्ट्रेलियाले वेस्ट इन्डिजविरुद्धको पाँच खेलको टी–२० अन्तर्राष्ट्रिय क्रिकेट शृंखलामा चौथो खेल पनि जित्दै शृंखला ४–० ले आफ्नो पक्षमा बनाएको छ। आइतबार बिहान सम्पन्न चौथो खेलमा अस्ट्रेलियाले ३ विकेटको रोमाञ्चक जित दर्ता गरेको हो। वेस्ट इन्डिजले दिएको २०६ रनको चुनौतीपूर्ण लक्ष्य अस्ट्रेलियाले १९.२ ओभरमा ७ विकेटको क्षतिमा पूरा गर्यो। अस्ट्रेलियाका लागि क्यामरन ग्रीनले उत्कृष्ट प्रदर्शन गर्दै ३५ बलमा अविजित ५५ रन बनाए। त्यसैगरी जोश इङ्लिसले आक्रामक ब्याटिङ गर्दै ३१ बलमा १० चौका र १ छक्कासहित अर्धशतक पुरा गरे। ग्लेन म्याक्सवेलले पनि १८ बलमा १ चौका र ६ छक्काको सहायताले तेज ४७ रन जोडे।
वेस्ट इन्डिजका बलरहरूमध्ये जेडिया ब्लेड सबैभन्दा सफल रहे, जसले ३ विकेट लिए। रोमारियो शेपहर्ड, अकिल होसेन र जेसन होल्डरले समान १–१ विकेट लिएका थिए। यसअघि, टस गुमाएर पहिला ब्याटिङको निम्तो पाएको वेस्ट इन्डिजले निर्धारित २० ओभरमा ९ विकेट गुमाउँदै २०५ रन बनाएको थियो। वेस्ट इन्डिजका लागि शेरफन रदरफोर्डले सर्वाधिक ३१ रन बनाए भने कप्तान रोभमान पावेल र रोमारियो शेपहर्डले समान २८ रन जोडे। जेसन होल्डरले पनि उपयोगी २६ रन बनाए।
बलिङतर्फ अस्ट्रेलियाका एडम जाम्पाले ३ विकेट लिँदै विपक्षीको स्कोर सीमित राख्न मद्दत गरे। आरोन हार्डी, शन एबट र जेभियर बार्टलेटले समान २–२ विकेट लिँदै टिमलाई सशक्त स्थिति दिलाए। यो जितसँगै अस्ट्रेलियाले पाँच खेलको टी–२० शृंखलामा ४–० को अजेय अग्रता बनाएको छ। अब शृंखलाको अन्तिम खेलमा अस्ट्रेलिया ‘क्लिन स्वीप’ गर्ने लक्ष्यमा हुनेछ भने वेस्ट इन्डिज आफ्नो सम्मान जोगाउने रणनीतिमा मैदान उत्रनेछ।
