धनगढी : सुदूरपश्चिम प्रदेशको आर्थिक मामिला तथा योजना मन्त्रालय र भौतिक पूर्वाधार विकास मन्त्रालय जाने बाटोमा बम फेला परेको छ। धनगढीस्थित मुख्य सडक नजिकै रहेका दुवै मन्त्रालय जाने बाटोमा कुकर बम जस्तै देखिने बस्तु फेला परेको हो।
मन्त्रालय जाने बाटोमा राखिएको उक्त बस्तु अहिले प्रहरीले मुख्य सडक पारी राखेको छ। जिल्ला प्रहरी कार्यालय कैलालीका प्रहरी नायव उपरिक्षक प्रतिक विष्टले बम जस्तै देखिने शंकास्पद बस्तु फेला परेको बताए।
उनका अनुसार डिस्पोजका लागि नेपाली सेनाको टोली सो स्थानमा पुगिरहेको छ। उता कैलालीको घोडाघोडी नगरपालिकाको गाडीमा आगजनी गरिएको छ। नगरपालिकाको से १ झ २४१ नम्बरको स्कारपियो गाडीमा आगजनी गरिएको हो।
घोडाघोडी नगरपालिकाका उप प्रमुख प्रेम कुमारी थापाले प्रयोग गर्ने गाडी पार्किङ गरिराखिएको अबस्थामा आगजनी गरिएको ईलाका प्रहरी कार्यालय सुखडका प्रमुख हरिशरण भट्टले जानकारी दिए।
आगलागीबाट गाडीको पछाडि पट्टिको भाग जलेको छ। आगलागी कस्ले ग¥यो भन्ने विषयमा केही खुलेको छैन्।
