धनगढी । चार दिन अघि विषालु च्याउ खाँदा बिरामी परेकी महिलाको आज (मंगलबार ) मृत्यु भएको छ। डडेल्धुराको नवदुर्गा गाउँपालिका वडा नम्बर ३ की ३५ वर्षीया बिस्ना धामीको सेती प्रादेशिक अस्पतालमा उपचारका क्रममा मृत्यु भएको हो।
यसअघि उनका ८ वर्षीय छोरा ललितको विषालु च्याउ खाएरै आइतबार मृत्यु भएको थियो। जंगलबाट टिपेर ल्याएको विषालु च्याउ खाँदा धामी परिवारका ५ जना बिरामी परेका थिए।
बिस्नाका छोरा ललित को डडेल्धुरा अस्पतालमा उपचार हुन नसकेपछि सेती प्रादेशिक अस्पताल ल्याउँदै गर्दा बाटोमै मृत्यु भएको थियो भने तीन छोरीको सेती अस्पतालमै उपचार भइरहेको छ। तीन मध्ये एकको अवस्था गम्भीर भएकाले आइसियूमा उपचार गरिरहेको अस्पतालले जनाएको छ।
