काठमाडौँ, १९ जेठ। प्रधानमन्त्री तथा मन्त्रिपरिषद्को कार्यालय सिंहदरबारमा सोमबार साँझ मन्त्रिपरिषद् बैठक सुरु भएको छ। बैठकमा समसामयिक राष्ट्रिय मुद्दा र मन्त्रालयगत कार्यसम्पादनसम्बन्धी विषयमा छलफल हुने अपेक्षा गरिएको छ। यसअघि आजै प्रधानमन्त्री केपी शर्मा ओली, नेपाली कांग्रेसका सभापति शेरबहादुर देउवा र नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’बीच भेटवार्ता भएको थियो। तीनै शीर्ष नेताबीच संसद्को लगातारको गतिरोध हटाउने विषयमा केन्द्रित भएर छलफल भएको स्रोतले जनाएको छ। संसद अवरुद्ध रहँदा विधायन प्रक्रिया, बजेटसम्बन्धी छलफल तथा अन्य महत्वपूर्ण निर्णयहरू प्रभावित भइरहेका छन्। यस्तो अवस्थामा नेताहरूबीचको संवाद र मन्त्रिपरिषद् बैठकले राजनीतिक गतिरोध समाधानतर्फ केही प्रगति हुने आशा गरिएको छ।
