२३ जेठ, काठमाडौं — भौतिक पूर्वाधार तथा यातायातमन्त्री देवेन्द्र दाहालले डिप्लोमा इन्जिनियरिङ काउन्सिल छिट्टै गठन हुने जानकारी दिएका छन्। उनले काउन्सिल गठनको प्रक्रिया सुरु भइसकेको बताएका छन्। यो घोषणा डिप्लोमा इन्जिनियर्स एसोसिएसनको ४५औं वार्षिकोत्सव तथा विश्व वातावरण दिवसको अवसरमा आयोजित कार्यशाला कार्यक्रममा गरिएको हो। मन्त्री दाहालले जलवायु परिवर्तनको असर घटाउन सामूहिक पहल आवश्यक रहेको बताए। उनले प्लास्टिक प्रयोगलाई मानव स्वास्थ्य, वन्यजन्तु र वातावरणका लागि घातक भन्दै यसको विकल्प विकास गरी प्रयोग घटाउनुपर्नेमा जोड दिए।
उनले स्थानीय, प्रदेश र संघीय सरकार सबैले नागरिक सहभागितामा आधारित वातावरण संरक्षण कार्यक्रम अघि सार्नुपर्ने बताए। कार्यक्रममा जलवायु परिवर्तन, प्लास्टिक प्रदूषण र वातावरणीय चुनौती विषयमा छलफल भएको थियो। डिप्लोमा इन्जिनियरिङ पेशाको मान्यता र व्यवस्थापनका लागि काउन्सिल गठन तिव्र गतिमा अगाडि बढ्दै गर्दा वातावरणीय सरोकारलाई पनि सरकारी प्राथमिकतामा राखिएको स्पष्ट संकेत मन्त्रीको वक्तव्यबाट देखिन्छ।
