काठमाडौँ — कम्बोडियाबाट पक्राउ गरी बुधबार राति काठमाडौं ल्याइएका मितेरी सहकारी ठगी प्रकरणका अभियुक्त ज्योतिबहादुर भण्डारीविरुद्ध काठमाडौं जिल्ला अदालतले सात दिनको अनुसन्धान म्याद थप गरेको छ। लिखतसम्बन्धी कसुर र ठगीको अभियोगमा अनुसन्धानलाई थप समय दिन अदालतले उक्त म्याद दिएको हो। पक्राउ परेका भण्डारीलाई प्रहरीको केन्द्रीय अनुसन्धान ब्यूरो (सीआईबी)ले बिहीबार अदालतमा पेश गरेको थियो।
सीआईबीका प्रवक्ता युवराज खड्काका अनुसार, नागरिकता, राहदानी र सहकारी ठगीको विषयमा समेत अनुसन्धान गर्न म्याद थप गरिएको हो। अनुसन्धानका क्रममा भण्डारीको नाममा कास्की र बर्दियाबाट दुई फरक–फरक नागरिकता तथा राहदानी रहेको पत्ता लागेको छ। यस विषयमा प्रहरीले थप छानबिन गरिरहेको छ।
मितेरी सहकारी ललितपुरमा कार्यालय रहेको एक सहकारी संस्था हो, जसले करिब १४४ जना बचतकर्ता र सञ्चालकको करिब १४ करोड रुपैयाँ रकम अपचलन गरेको आरोप लागेको छ। भण्डारी लामो समयदेखि फरार थिए र उनको विरुद्ध इन्टरपोलमार्फत रेड नोटिस समेत जारी गरिएको थियो। भण्डारीले नेपाली कांग्रेसका उपसभापति धनराज गुरुङकी पूर्वश्रीमती ज्योति गुरुङमार्फत सहकारीको रकम लिएर घोटाला गरेको बताइएको छ। प्रहरीले यो रकम क्रिप्टोमार्फत विदेश पुर्याएको आशंका गरेको छ।
