३० असार, काठमाडौं । त्रिभुवन अन्तर्राष्ट्रिय विमानस्थलस्थित अध्यागमन कार्यालयले कर्मचारीहरूको जिम्मेवारी स्पष्ट पार्दै ‘एकीकृत जबाफदेहिता फ्रेमवर्क, २०८२’ लागू गरेको छ। फ्रेमवर्कमार्फत अध्यागमन प्रक्रियामा हुने त्रुटि, विवाद र अनियमिततामा संलग्न कर्मचारीलाई अब सहजै उन्मुक्ति नदिइने भएको हो। अध्यागमन कार्यालयले सोमबार एक विज्ञप्ति जारी गर्दै नयाँ फ्रेमवर्क लागू भएको जानकारी दिएको छ। उक्त दस्तावेजले कर्मचारीको काम, कर्तव्य र अधिकार स्पष्ट पार्दै त्रुटि भएमा कसले जिम्मेवारी लिने भन्ने विषयमा स्पष्ट निर्देश दिएको छ।
फ्रेमवर्कले अध्यागमन प्रक्रियालाई तीन मुख्य खण्डमा वर्गीकरण गर्दै कारबाहीका स्पष्ट मापदण्ड तय गरेको छ: नेपाली नागरिकको प्रस्थान – नक्कली कागजात प्रयोग गरी यात्रा गर्न खोजेमा यात्रुका साथै संलग्न मेनपावर वा कन्सल्टेन्सीलाई पनि मुलुकी अपराध संहिता बमोजिम कारबाही गरिनेछ। अधुरा कागजात भएको अवस्थामा प्रस्थान अनुमति दिने डेस्कका अधिकारीहरू प्राथमिक जिम्मेवार हुनेछन् भने वरिष्ठ अध्यागमन अधिकृतलाई अन्तिम जिम्मेवार ठहरिनेछ। प्रतिबन्धित यात्रु प्रस्थान गरेमा सम्बन्धित एयरलाइन्स कम्पनीमाथि कारबाही सिफारिस गरी नागरिक उड्डयन प्राधिकरणमा जानकारी गराइनेछ।
