१३ साउन, काठमाडौं । पछिल्लो एक वर्षमा थाइल्याण्डबाट नेपाल हुँदै भारत तस्करी गरिने गरी २०७ किलो गाँजा बरामद भएको छ। लागु औषध नियन्त्रण ब्यूरो (Narcotics Control Bureau) का अनुसार आर्थिक वर्ष २०८१/८२ मा थाइल्याण्डबाट तस्करीको लागि ल्याइएको सो परिमाणको गाँजा नियन्त्रणमा लिइएको हो। ब्यूरोले नेपाललाई ट्रान्जिट बनाइ भारत पठाउने उद्देश्यले तस्करहरूले यो मार्ग अपनाएको जनाएको छ। ब्यूरोका अधिकारीहरूका अनुसार थाइल्याण्डको गाँजा उच्च गुणस्तरको हुने भएकाले यसको तस्करी दर बढ्दो छ।
उक्त आर्थिक वर्षमा गाँजासँगै अन्य विभिन्न प्रकारका लागु औषध पनि बरामद गरिएको छ। कोकिन १८ किलो ९१९ ग्राम, हेरोइन २५ किलो २३७ ग्राम, अफिम २८ किलो र एम्फेटामाइन २७२ ग्राम बरामद भएको ब्यूरोले जानकारी दिएको छ। ब्यूरोका अनुसार २०८१/८२ मा लागु औषध सम्बन्धी १ हजार १३२ मुद्दा दर्ता गरिएका छन् भने १ हजार ६७५ जनालाई पक्राउ गरिएको छ। ब्यूरोले नेपाललाई लागु औषध तस्करीको ‘ट्रान्जिट प्वाइन्ट’ बनाउने गतिविधि बढेकाले नियन्त्रणका उपायहरू थप कडा बनाइएको जनाएको छ।
