१३ साउन, काठमाडौं — संयुक्त राष्ट्रसंघको आह्वानमा इराकमा शान्ति स्थापना र सुरक्षा प्रदान गर्न परिचालित नेपाली शान्ति सैनिकहरूको टोली स्वदेश फिर्ता भएको छ। इराकमा सञ्चालन हुँदै आएको राष्ट्रसंघको ‘मिशन’ आगामी साउन १६ गतेसम्म मात्र रहने निर्णय भएपछि आज २७ जना शान्ति सैनिकहरूको अन्तिम टोली स्वदेश फर्किएको हो। नेपाली सेनाको जनसम्पर्क सूचना निर्देशनालयका अनुसार, यसअघि पनि इराकबाट तीन वटा टोली नेपाली शान्ति सैनिकहरू स्वदेश आइसकेका छन्। इराकमा नेपाली शान्ति सैनिकहरूले शान्ति सुरक्षा र पुनर्निर्माणका विभिन्न जिम्मेवारीहरू निर्वाह गर्दै आएको थियो।
